الاثنين

للعلالي يابلادي واصلي للعالمية


سمعت مقابلة في الـ إف إم لأحد الشعراء.. وحديثه عن  الغزل ..في المجتمع العربي والسعودي خاصه .سأل المذيع الشاعر وهو يضحك :هل مجتمعنا حالم؟وهل عندنا رومانسيه وغزل؟؟ رد الشاعر برد  يخفي في طياته الكثير من الدجل والنصب
 لأنه يرد وهو يضحك: أكيد طبعاً مجتمعنا رومانسي 


حقيقه..هذا السؤال جعلني أحكم وإن كنت قاسي في حكمي على أن أغلب مجتمعنا مجتمع دفش همجي ويفتقد للرومانسية..في كل شيْ..ولا
يحتاج هذا الأمر إلى برهان أو دليل مادي لكي يثبت كلامي..للأسف نحن شعب يستحق الزمالة بالهمجيه والدفاشه مع مرتبة الشرف!! الدفاشه  والهمجيه التي نعيشها.. ليست حكراً على أحد دون أحد.. فنحن جميعاً مشتركون فيها.. جميع طبقات وفئات وأطياف المجتمع دون إستثناء
/
  لاأنت قيس أبن الملوّح ولا أنا ليلى العامرية:
المشكله لاحريمنا راضين عنا ولا أحنا راضين عنهم تلقى الزوج يصب كامل اللوم بعدم رومانسيته في وعاء زوجته وعلى عكس ذلك الزوجه!! وحتى اللي ماهم متزوجين ..يعني تلقى السعودي ذو العلابي السوداء..منتشي عاطفياً وتوه شايف له فلم رومنسي يتصل على حبيبته ...يقولها كلام حلو فـ ينصدم أن الرد من أم ركبه سوداء ..(وش عنده مسوي رومنسي)!! طيب الرجال جاي من أقصاه وحالته حاله وحنكه تلقينه بغى يطيح وهو يقول هالـ كم جمله اللي حافظها من الفلم ..آخرتها تحطمينه!!

 
وبالمقابل تلقى البنت تكلم حبيبها أول مايرد تقوله كلمه حافظتها من مسلسل تركي بزعمها راح تخليه ينبسط ويضم أقرب مركى جنبه وتتفاجأ  أنه يقول:
أقول بلا مصخره وجهزي عمرك أبي أتسوق وأبيك تجين معي تونسيني(يعني حتى  مايقول ابيك تختارين أو ذوقك يهمني)!!ـ
/
بشرني عساه ولد ؟:
سألني أحد أصدقائي:شرايك بمجتمعنا؟ قلت:ودك تشّب فيه!! قال:وش النقطه اللي ماهي عاجبتك في مجتمعنا؟ قلت لو بتكلم عن كل شي بتتعب..قال:تفضل أسمعك ..قلت:يعني من بداية طلوعك للدنيا تدري أن مجتمعك بايخ يعني وقت الولاده تلقى الأبو يقول للدكتور هاه بشر عساه ولد !!يعني الحمد لله أن الطفل مايستوعب شي ولا كان تلقى البنت إذا سمعت أبوها يقول هالكلام وقت ولادتها بتتعلق بحبل أمها السري وترجع لبطنها من الضيقه!!


وإذا تحقق حلم الأب وجاه ولد أول ما يبدأ الولد يتكلم ويستوعب الأشياء اللي حوله تلقى أكثر كلمه يسمعها(عيب خلك رجآل)طيب ياخي توني ماوصلت مرحلة العيب خلني أعيش طفولتي !!ولايقلط شايب عند أبوك وأنت صغير توك بديت تنطق ماما وبابا عمرك ماتعدى 4سنوات وشافك قمت تلعب بالفنجال ولا تتشقلب ع المركى بيخزك بنظره ويقول أمش أقعد هنا خلك رجال!!(وش اللي خلك رجال؟خله يلعب أكيد بتحوم كبد هالصغير من سوالفكم اللي نص الوقت يروح على شلونكم طيبين ؟يرد الثاني بخير الله يسلمك انتم شلونكم؟)
خطر يصرخ البزر يصير يتكلم بطلاقه يقول :إذا ماعندكم سوالف أنت وياه كل واحد يطس يرقد!
يعني تلقى البزر هذا يكبر على (عيب وخلك رجآل)ـ


والمشكله لو ترجع لماضي هالشيبان وتبحث في البوم صورهم
بتلقى صوره لهم(بشاطئ عراة ومن زود الملح  شعورهم آفرو  ولابسين جنز على أيام موضة البراشوت اللي ضيّق من فوق وبآخر الساق منتفخ كنه فستان بزر بتروح لزواج)!!طيب وين خلّك رجال وعيب؟

/
 ناتج عيب وخلك رجآل =مجتمع مهزوز شخصية: 
والدليل قارنوا الطفل الأجنبي بالسعودي!! شتان مابين الأشقر والأشهب !!!
يعني لو تجيب طفل أمريكي تطلعه بالتلفزيون تسوي معه لقاء تسأله تلقاه يجاوب بكل ثقه واذا رجع للبيت تلقى  أبوه وأمه يناقشونه عن سؤال المذيع
ويحفزونه (u are original)ـ


بينما الأشهب السعودي تسوي معه مقابله تسأله تقوله وش أسمك؟
 يقعد يفحط بمكانه ويشبك يدينه في بعض ويتلفت يدور أبوه ولا يحك عينه مدري يعني هل السؤال يجيب حساسية؟!
بالأخير تحوم كبد المذيع ويلتفت على ابوه ويجي الأب مسوي حنون يقول بإبتسامه
 قل أسمي خالد ..وبالعذاب يجاوب هالأشهب الصغير ومع طقطقة ضروس يقول ..خا..ويسكت شوي ويكملها بـ (لد)ودك تصفق المايك على وجهه !!!


وإذا راح هالأشهب وركب السيارة مع أبوه تلقاهم طول الطريق الأبو يقول ليه مستحي خلك رجآل(مايدري أن هالكلمه هي اللي خلت ولده  كنه بنت توها بالغه ومجاملتها عمتها قايله لها تراك مخطوبه لولدي!!)ـ
/
نقص الحنان وتشبّع دفاشه:
يعني الشاب تلقاه من نقص الحنان الي فيه صاير فاغر لو تقوله وحده إذا سمحت قال هذي تحبني !!
والبنت سبهه لأبعد درجه لو تقرى توقيع في منتدى لشخص يقول فيه حبيبتي يامن دخلت ومن غير تذكرة دخول إلى قلبي..الخ,
تلقاها تهيم وتروح ترسله رساله مين تقصد ؟؟بزعمها أنه يقصدها
/
تم تسجيل دخوووول هنّوو:
واحد من الشباب  قبل أسبوعين دخل أيميله  والايميل هذا صار له تقريبا سنه وزيادة مادخله ...
يقول :جلست أسولف مع اللي  تذكرتهم  بعد تقريبا ربع ساعه طلعة النافذة تم تسجيل دخول وكان التوبيك(هنّووو)..
يقول  قلت من هذي هنّو؟لأني ما أذكر أن عندي بنات وأكثر بنت صبرت على دفاشتي قعدت يوم وحذفتني!!
المهم جت هنّو تلقي تحية الاسلام  لصديقي وهو مصدق نفسه ومسوي ذكي رد التحية وقال : يووووه من زمان عنك كيف حالك ياهنووو؟
كان الرد من هنو؟أجل زمان عني يالقاطع؟والله شكلك ناسيني ماعرفتني؟
 توهق صديقي خاف يقول الا اذكرك انتي هند ويصير أسمها هنادي !!
ولأن صديقي وقتها كان متابع فلم وكانت البطله مخفه تسامح حبيبها حتى اذا خانها ونسى يوم ميلادها ودايم تقول سامحتك لأنك صارحتني
قال لهنّو:والله تبين الجد ناسيك من معي؟
وليته ماقال من معي لأن الرد من هنو كان:معك هاني مفرح الي قابلتك  بمقهى شيشه!

أنا بيني وبينكم ضاق صدري قلت لصديقي لو أني مكانك عطيته حظر وحطيت التوبيك أحذفوني...!!
يعني شوفو حالة هاني أو خلوني أناديه زي مايحب (هنووو)هذا مالومه تلقون أهله مادلعوه وهو صغير أزعجوه بكلمة خلّك رجآل فـ كبر وفيه جانب طفولي ماخذا حقه وصار يدلع نفسه وخويي صار الضحية!!
/
الهمجية حدث ولاحرج:
واحد راح لصرافه ولقاها خربانه والمطمه لقى(تفله تكرمون)عشانها خربانه تتفل طيب ياخي راع شعور اللي بيجي بعدك والمشكله متأكد أن أبو تفله مافي رصيده ألا 200 


ولا قبل فتره كنت  توني طالع من النادي لابس شورت ورايح أبي عصير من خمسين فاكهه أول مره أتحمس  أشرب عصير طازج كونه أول يوم لي بالنادي ولأني متأكد أني ماراح أروح غير هالمره حبيت أعيش دور الرياضي الصحّي..وأنا أنتظر الطلب جاني شخص والمشكله ماهو مطوّع يقول ترى لبسك مايجوز ومنقوود!!أنا قعدت أناظر تحت قلت يمكن السحاب مفتوح!!سألته قلت ليه وش المنقود فيه؟ قال كله على بعضه !قلت في نفسي يمكن  عشاني في مكان عام؟!بس المشكله أنه جاي بقميص نوم ولابس سروال طويل أطول من القميص ولاتهون الطاقية الحساوية!!


أنا أعتذرت منه وشرحت له أني طالع من نادي وتفهّم الوضع وتأسف   (قوووية ياهذرة قل الصدق بلاش كذب)!!
طيب طيب بقول الصدق صراحه أنا قللت أدبي شوي قلت طيب تبي أفك زرار الشورت أعلمك وش المنقوود وصار فيه تبادل سبّات وفرقونا الموجودين وكل واحد ركب سيارته ومشى بدون عصير!!(أيوووه ياهذرة خلك صادق كذا) 


ومره كنت بسوق وفيه مجموعة بنات..تقريبا خمسه يمشون بجنب بعض وأصواتهم عاليه كنهم في حراج  وزود على أنهم ازعجونا بنشازهم وحده منهم قعدت تضحك تقول أنطمي ياكذابة وتدف خويتها بقوه ..خبطت في حرمه معها بزرها اللي يقوطر براءه ومايحوّم الكبد أبد خصوصا أن نص وجهه صاير أحمر من حلاو القطن  !!


/

خبل الحارة:
أنا جت فترة صرت أمشي بعد صلاة العصر بالممشى بالحي اللي ساكن فيه
تقريباً عشر سيارات وقفت جنبي كلهم شيبان حارتنا اللي يقول سلامات شفيك تركض؟ واللي يقول تبي أوصلّك؟وكأنهم يقولون وش ذا الهايت الصايع اللي مالقى بيت يضفّه يعني مافيه خصوصية بعدها لاحظت أن بزارين الحارة صاروا يخافون مني!!!سألت ولد جيرانا اللي كل يوم يسطح كورته ومرات تخبط براسي قلت شفيهم اذا شافوني يتراكضون؟ قال لأن أهلهم قايلين لهم لاتطلعون بالشارع ترى بيجيكم المهبول يخطفكم!! يعني الحين عشاني أسوي رياضه صرت مهبول ..يبوني أتمدد بملحقنا وأملي بطني وأتاغر الين ينتفخ بطني كني حامل بالشهر التاسع

/

عزّ الله ان هالبنت سنعه:
ونفس الحكاية بناتنا المغلوب على أمرهم..يعني مثل ماعقدونا بكلمة عيب وخلك رجآل!البنت هبلو فيها  بكلمة خليك سنعه..لحد ماصارت مطفوقه وفاهمه السنع غلط يعني تلقاها من كثر ماسمعت كلمة خليك سنعه لاتصيرين رفله
 إذا تزوجت تلقاها من صبح الله تشغل مكنسة الكهرب وتقعد تكنس لحد ماتوصل غرفة النوم  وزوجها نايم !!
 أنا مالومها ماهو منها من السناعه اللي تدورها من يومها صغيرة

/
 قبل كم يوم كنت أبي أطلع أتمشى وأنا ماشي بالحوش متجه لسيارتي سمعت جارتنا وأتوقع أنها البنت
 لأنها تقول:وين المكنسة ولاتحسبوني ماني سنعه !!
كنها تبيني أسمع عشان أقول أثر بنت جيرانا هبـة ريح ماشاء الله


 رديت على رسالتها عشان تقول أني كفو  قلت بصوت عالي ليه ماغسلتو شماغي ولا تبوني أطلع بدون شماغ كني بزرّ ! 
ثم عدلت التي شيرت وطلعت مفتاح السيارة من مخبأ شورتي  متجه لسيارتي وأنا أضحك على مجتمعنا اللي فاهم السناعه والعيب غلط!!! 

هناك 19 تعليقًا:

  1. شيق ويحتاج وقفه يعني الى متى وحنا كذا ماتتغيير عاداتنا والسبب المجتمع الامبريالي الي كل شي عيب كل شي حرام مجتمع هدام مجتمع بس ينقد متى يصير لنا خصوصيه ، تصدق اني كل مافكر بالزواج افكر بالمجتمع وشيل الفكره من راسي لانوه المجتمع برايي هو الي بناء العنوسه بأفكاره الهدامه ياخي انت تنوي تكمل نص دينك وتبي تعرس من ثم اعطوك ذاك المبلغ بالفره ماينقص عن 100000 تبي ولا ظف وجهك ماعندنا بنات تحس ان المسأله ماهي زواج يتاجرون بك لا وتعال ليله العرس المسأله ماصارت فرحه العريس والعروسه الي انت دافع لها ذاك المبلغ ومامعك بجيبك الا حق عشاءالليله
    المسأله انت وش تبي تحط ع ششان المجتمع يسولف بعرسك وبعدها بالمحكمه مطلوب لشركات السيارات ع شان المجتمع انا اطلب بالتغيير والتغيير السريع البناء اشكرك ياهذرة على هذا الطرح أهني افكارك البنائه في خدمه المجتمع الهدام واتنمى التغيير

    ردحذف
  2. ههههههههههههههههههههههههههههههههههههههههههههههههههههههه
    الله يرجك بس والله صادق بس اللي ابي اقوله انها فئه من مجتمعنا ماهو كلهم

    مجتمع بايخ ومتناقض وبقوة بعد....... خذ هذي الحالات اللي تحوم الكبد:

    بنت اثناء سفرتي للخارج تتغطى عني في الطيارة يوم دخلت وكنة قارصها عقرب ونوصل المطار هناك وتسحب شناطها تفتحها وترمي العبايه ونص صدرها طالع .... ولا تقول لي ممكن تساعدني وترفع الشنطة الكبيرة ذي لي!!!!!!


    - المطاوعه يقولون لاحد ياكل كثير و يستدلون بحديث الرسول عليه الصلاة والسلام " نحن قوم لانأكل واذا اكلنا لانشبع" وهم يلحسون صحن المندي لحس, واجسامهم كانهم لعيبة سومو.


    انا بهاجر ماني قاعد تخاويني بس؟!!!

    ردحذف
  3. غير معرفنوفمبر 09, 2010

    ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه والله بالصميم صدق حنا يالبنات مغلوب على أمرنا أشكر لك وقفتك معنا صراحه أستغربتها منك واقف معنا انا شفت "مدونتي" بتوقيعك بالمنتدى قلت بشوف وش عنده بس أهنييييك على اسلوبك الساخر بطرح المواضيع

    ردحذف
  4. هههههههههههههههههههههههههههههههههههههههههه أما المقارنه بين الأشهب والأشقر بطله هههههههههههههههههه

    بالأمانه يا هذرة وش ترجي من مجتمع ظلوووم مجتمع ملعوون والدين ودك تشق ثوووبك وتصايح باعلى صوووت الله يلعن امك يالمجتمع . مجتمع ماهمه الى وش صار على ولد فلان ولا وش صار على بنت فلانه ... يجيني ابو كرش <<<تعرفه مايحتاج , يووم يسوووي لي مقابلة شخصية أول مره ادري ان في الزواج مقابلة شخصية ..
    س1 / انت فاصل من العسكرية عشان تحليل مخدرات ؟
    بالله وش تبيني ارد عليه ياخي الواحد لو ماهضم الكلية قالو عنه راعي بلاوي .
    س2/ حادث الكابرس صدق كنت محمل بضاعه الي مسويه مع المرور ؟
    انا جالس في الإدعاء العام ولا وييين ..يعني المرور مايخطي ابد
    س3 / انت تشرب ؟؟
    والله ماراح اعلق ..............

    مجتمع مايحترم الرغبات ومايحترم القرارت الفردية ...

    مجتمع يبي يمشيك على كلام فلان وعلان ...

    وبالنهاية تفووووووووووو عليك مجتمع مخيس ....

    ردحذف
  5. حي الله أهل كتاب الوجه< ياشين أسمه بالعربي نرجع من جديد نعدّل .. حي الله اهل الفيس بوك < كذا تحسه مقبول
    -------------
    والله شابين على هالمجتمّع هههههه راجع لكم ان شاء الله لأن ردودكم يبيلها مخمخه ورواقه .. وانا الحين راجفني البرد ولاعن شكلي .. أكتب حرف وأتراجف ضروسي طقطقتها كنّها صوت دركتر

    ردحذف
  6. غير معرففبراير 24, 2011

    هههههههههههههههههههههههههههههههههههههههههههههههههههههههههههههههههههههههههههههههههههههههههههههه
    الله يرجك احلى شي وصفك مشاء الله بس وينك غاطس ماعاد تكتب لا هنا ولا بالساخر ؟

    ردحذف
  7. غير معرففبراير 24, 2011

    أهم شي وانت تبي تسمع بنت جيرانكم انك تبي شماغ وهي تسأل عن المكنسه خخخخخخخخخخ
    اسلوبك حلو ماشاء الله بإنتظار تدوينات اخرى

    ردحذف
  8. غير معرففبراير 24, 2011

    هاني مفررح هههههههههههههههههههههههههههههههههههه
    هههههههههههههههههههههههههههههههههههههههههههههههه
    مجنوووووووووووووون سجلني متابعه لك ياهذره وبقووووه

    ردحذف
  9. غير معرفمارس 04, 2011

    أحسن شي خبل الحاره خخخخخخخخخخخخخخخخخ ياخي وينك حطيت موضوعين ومعاد لك حس ملينا كل شوي نجي ومانلقى جديد لاتبخل ترى بنمل

    ردحذف
  10. هههههههههههههه الله يغربل بليسك بس بسألك معقوله يوم سمعت بنت جيرانكم بس رديت على رسالتها ؟ يعني مارميت شي هههههههه لا تقطع يبو داحم مالك حس بالساخر وش ذا التغلي ؟

    ردحذف
  11. هههههههههههـ مت ضحك الله يصلحك ياخييِ
    بس تبي الصج أغلبها موجودةَ بمجتمعناَ الفاهمَ
    المشكةً دايم أسمعهم يقولون مجتمعناً ومجتمعناً
    والمشكلهً تلقى اللي يتكلمً أردى منهمً
    بس حلو انت تنتقد وتسوي الشيء الصحً
    بس لاحظت بالأونه الاخيرة ان المجتمع بدى يفهمً
    بدىَ يصحصحً شويِ يعنيٍ الحمدلله قلت نسبة الكروش عندناً
    بس بالنسبه لخلك سنعه وخلك رجال ماعاد نسمعها الحين كل الأعتماد عالخدامة والسواق الله يخلف علينا
    لاكن أكتشفتَ أن التعليم له دور بتغيير المجتمع بالكاملَ
    يعني حلو الواحد يقرا ويتثقفَ من الغربً
    طبعاً موبكل شيءِ الحين يروح واحد منهم ويقرا الانجيلَ
    >>>> ياحبني للفلسفه هع
    مدونة ختيرةً قمت احوس من الضحك هههههههآآي
    متابعة وبقوووةَ ^_^

    ردحذف
  12. غير معرفمارس 08, 2011

    ههههههههههههههههههههههههههههههههههههه
    ههههههههههههههههههههههههههههههههههههههه
    لايوقف لايوقف كثر من ذا الهذرات راجع لك يابطل أنا مادريت عن مدونتك هذي , قالي عنها(عشق الكتابه)هو جنبي الحين يسلم عليك .. محدثك(فلسفه)وارجع للمنتدى لاتخليني استخدم اسلوب العنف معك

    ردحذف
  13. محمد هلا هلابك ياهلا :
    صدقت مجتمعنا الامبريالي كل شي عيب
    وعلى قولتك المهر غالي ووجه راعية المهر مايستاهل يعني نادر تلقى زوجه تستاهل مهرها انا متأكد يامحمد إحتمال أنك اذا جيت تخطب وشفت البنت يمكن تروح تخطب من حديقة الحيوان أصرف لك (ورده)

    //

    عبدالعزيز أرعد يومك:
    من ناحية متناقض فهو متناقض وبقووه ..بعدين الموقف اللي صار لك وانت مسافر شكلك مافهمت البنت زين هي يمكن قصدها شنطتها هب موب شنطة عفشها وبالنسبه للهجره أنا لو ماطلع وأغير جو صدقني راح تكون كارثه فـ سجلني معك ياعزيزي (نخب الهجره يابطل)

    //
    إبراهيم: بالحضن بالحضن ياحبيبي بالحضن
    والله يا أخ ابراهيم مالومك تعصب!! يعني الحين هذا أبو كرش اللي انت خاطب بنته بدال مايحب يده وجه وقفى قام يحقق معك!! أنا لو مكانك كان قلت
    عزيزي أبو كرش :يومك تسألني هالأسئله بتنام معي ليلة الدخله مثلاً؟
    ياخي فعلا مجتمع مايحترم الخصوصية ولا يراعي مشاعر الآخرين
    ياخي أنا أقرب مثال أنا الشاب الفقير لله لعبوا في نفسيتي عماني تخيل اخوي الكبير جايني يقولي ياعبدالرحمن ابشرك لقيت لك وظيفه قلت صدق ؟ قال ايه تبي اوظفك ولالا ؟ قلت طيب وشي؟ قالي بوظفك شطه في مطعم !!شف شلون الاستهتار في مشاعر العاطلين ماقول الا ياعيب الشوم ع هيك مجتمع (ورده ذابله للمجتمع وورده متفتحه لك يا هيمو)

    //

    المجهولين : تشرفت واللهي وأستحيت من ردودكم من الحيا شبكت يديني فـ بعض وقمت اشخمط برجولي ع الأرض .. (لاخلا ولاعدم)

    //

    شخص ماء: هلابك عدد خيوط ثيابك ... والله خابر دفاشتي أن رميت عليها شي ماراح أرمي ورده ولا ورقه فيها رم ..يمكن أرمي عليها سيكل ولد خالتي اللي له سنتين بحوشنا جنزيره مصدّي .. يعني بيجيها غرغرينا والسبب محاولة تميلح من سموّي الدفش... وإن شاء الله بتلقاني بس منشغل هالفتره الله يفرجها سعدت بسؤالك يارعاك الله


    ///
    زٍحَ’ـمةَ حَ’ـڪيّ..

    عسى دوم تضحك لك الدنيا , والله وانا اخوك الواحد يحاول يغيّر شوي من غباء عاداتنا يحاول بس المجتمع يعطيه فاول !!بس على قولتك من تالي يعني فيه تحسن شوي .. وصدقتي قلة نسبة الكروش بس بالمقابل اللي اشوفه أن كروشهم صارت تطلع من ورى !! الله يرفع عنهم ولايبتلينا ...
    أما يروح يقرى الأنجيل ههههههههههههه هذا مثل واحد الله يستر عليه .. صاجنا ومسوي زحمه وكل ماقعد معنا ينتقد ويتهزى أنا قلت ماشاء الله شكله تعلم وعرف حاجات تفيد شخصيته قلت بختبره اشوف تعلم إحترام المواعيد ولا لا؟ دقيت عليه قلت تعال الساعه 9 بالليل قالي طيب.. ولا جاني الا الساعه 12 !!! وانصدمت بعد فتره أن الشي الوحيد اللي أستفاده من حركاتهم أنه اذا راح المطار ودخل دورة المياه(أكرمكم الله) يروح للمرحاض اللي يقضي حاجته وهو واقف !!!
    واتشرف بمتابعتك

    //

    فلسفه: ياهلا وغلا وصينية حلا ,
    الله يسلمك ويسلم عشق الكتابه .. وماله داعي ترجع تعلق ماني فاضي تحجب الصفحه والسبه وساختك (<قلب)ههههه بعدين وش اللي أرجع للمنتدى؟ ولا بستخدم العنف حسيت إني بنت زعلانه على زوجها وأبوها حامت كبده منها يبي يرجعها غصب ! ماتركت المنتدى انا عشان أرجع بس انشغلت هالفتره وإن شاء الله راجع

    ردحذف
  14. غير معرفمايو 14, 2011

    ههههههههههههههههههههههههههههههههههههههه
    وربي مخك فاصل هههههههههههههههههههههه
    رحمت بنت جيرانكم ياقلبي تنرحم بس شي رسايلكم لبعض هههههههههههههههههههههههههههههههه
    واصل يامنحرف واصل
    تحياتي واشواقي ..مدرسة الغفله

    ردحذف
  15. -
    ف الصمييييييييم و قسسم قسسمآتْ

    مدوونتك رآئعه و هذرتك آروووع

    = )

    ردحذف
  16. مدرسة الغفله/ وربي مدري هذي مدحه ولا سبه ^_^
    وان شاء الله انك تصيرين مدرسة صدق مهوب بالغفله
    تحياتي الحاره انا وبنات الحاره

    ------------------------------

    ωϊsнєs ๑/ والله ماعرفت اقرا اسمك لعدة أسباب:
    1- الشوف شجر ونظارتي ضايعه
    2- علاقتي باللغه الانجليزيه مثل علاقة بينلوبي كروز بالبرقع
    3- حاطه نكك رموز وحروف مزخرفه

    وقسم قسمآت انتي الأروع شكراً عشر مرآت وماتكفيك

    ردحذف
  17. غير معرفيوليو 22, 2011

    ههههههههههههههههههههههههههههههههههههههههههههههه ، مممن جججد شرّر البلية مايضضضحك . .
    على قد ما إنك ناقششت موضوع حساس في مجتمعنا ، على قد ماكان اسسلوبك عيااري وبطططل . .
    ( خلك رجال ) اظظمنن لك إن ذا العباره هي السبب في إن نص عيالنا محششين ونصهم الثاني مفحطين :(

    عجججبني أسسسلوبك في الكتابه ، ششفت الرابط من المساطيل وقلت نشوف ذا اللي عاكس التيار وشش عنده ، وكانت امي داعيه وحماتي بتححبني إني دخلت هنا . .
    سسجلني من اككبر متابععينك ، لافض فاهُك :)

    ردحذف
  18. مجهول المساطيل ... ههههههههههه الله يهديك خليتنا نوعين محششين ومفحطين طيب عندك أنا, لو امشي 120 امتلت المرتبه من السوائل ههههههه تصكني ام الركب ... والحشيش لو واحد يحشش عندي اغمى علي ..

    وأنت بعد عجبني فيك أنك ماعندك وقت خليت الناس كلها مفحطين وحشاشين ههههههه يعجبني اللي يقدح من راسه وش زودك عن ذا اللي كل شوي مطلعين لنا فتوى ابد خلك على ذا الموال يافديت خشيمك

    اطال الله في عمر والدتك وحبب حماتك في حضرة جنابك
    سجلني من المنتظرين لتشريفك

    ردحذف
  19. غير معرفمايو 28, 2013

    في امل تنزل تدوينة جديدة ؟! :(

    ياخي احس احلم .. مهجوره المدونة : /

    لسا عندي امل كل فترة بخش اشيك : )

    ردحذف