السبت

قهوجي العائله ...!


الخميس الساعه 4 العصر هدووء يسيطر على الغرفه وأنا غاط في نوم عميق
 دق الجوال رديت بدون ماشوف مين اللي يدق  لأن الغمص مغطي  عيوني !!!
: الووو هلا أبو محمد.
...صحصحت رميت البطانيه ..هلا عمي هلابك..وبعد  كيف حالك انت وش علومك,
عمي:أسمع وانا عمك اليوم فيه عشى بالاستراحه مو زي دايم ماتجي تراك نقدتنا عند الجماعه ترى بيشكون أنك راعي بلاوي أمش وخلك رجآل
(لاحول رجعنا لسالفة خلك رجال)!!ِ

وكالعاده الرد مني:أبشر ياعم لا ان شاء الله بجي وانا اللي بصب لهم القهوه
طبعا انا اقول انا اللي بصبها لأني عارف أن محدن صابها الا أنا كالعاده فـ تجي مني أحسن

قفل الخط سحبت البطانية أبكمل نومي ماقدرت فزيت بقوه رميت البطانيه وأصفق بوجهي ليييه ردييت لييييه لييييه.. رابطت بالغرفه وأنا متربع ع السرير لا أنا اللي قمت ولانا اللي نمت كل مخططاتي اللي ناوي اسويها الليله تلاشت وطول مانا بالغرفه ساكت وأطلع صوت الإمتعاض(تسؤ)< مدري شلون تنكتب بس أن شاء الله انكم عرفتوها لأني متأكد تقولونها


طق طق هذره طق طق طق طق طق طق طق طق طق طق ..
أكيد أن اللي يطق باب الغرفه أبوي هذي حركته بالبدايه تقول وش ذا اللي مايبي يزعج ولده ,ومجرد مايقول أسمي يبتل يطق مايعطيني مجال أرد واقول صحيت خلاص ! وبعد ماتعب من عزف سمفونيته بيده ..كمل الباقي برجوله !!
 رديت بصوت عالي: صااااحي صاااحي وكل شوي يخفت صوتي لأن خانقتني العبره يرجع يطق كنه ماسمعني !!

تسيطر علي العبره ابي اقول صاحي تطلع(اهئ اهئ) قمت فتحت الباب
 يطالع فيني أبوي وبصوت عالي: صحييييت ؟ 
أنا حواجبي أنقلبت علامة تعجب !!
 (يعني فتحت الباب بكون نايم مثلا؟ او قريني اللي قام وفتح لك؟)


قلت: إيه صحيت .. يرد علي: قم جعلك السهاد !!! (مازال مصر إني ماصحيت)؟؟
عطاني ظهره وهو يقول: يالله لا تتأخر متى يمديك تتروش وتلبس ترى فيه عزيمه

قلت: الله صدق فيه عزيمه يووه يالوناسه لو إني داري أن فيه عزيمه كان مانمت من الفرحه بحط ثوبي وشماغي قدامي وأتفرج عليهم مثل البزر ليلة العيد 


غسلت خشتي تقهويت وأمي تقول يالله لا تتأخر, قلت: ألا ماتبين زعفران؟
 تبين أروح اجيب؟ قالت: خلها بكره مايمدينا 

مر من عندنا أخوي الكبير ومعه شماغه متجه لغرفته ,قلت ورى ماتسلم ؟
 قال بسخريه: ما أنتبهت لك آسف! أسلم ليش؟ حايمه كبدي منّك قم البس بس  
أنا كنت أبي أتهاوش معه عشان اقول أنا زعلت وماني رايح العزيمه بس
(مافادت خطة الزعفران ولافاد التحرش بأخوي)

رجعت التفت على أمي قلت: متى تعترفون؟
 قالت بإيش؟؟؟؟
قلت:أقول أعترفي ترى كل شي بان
قالت:شفيك وش نعترف فيه ؟
 قلت: إني ماني ولدكم !
 جلست تضحك قالت: مهوب وقت استهبالك ياولدي قم البس بس !!!
 لاحول حتى فكرة إني ماني ولدهم مافادت كنت متوقع تتنرفز وتقول إيه منتب ولدنا وأمسك الباب كني بروح أدور أهلي الصدقيين 


أذن العشاء ..قرب موعد الكرف بديت أتنرفز لبست الشماغ
 دق جوالي(عمي):هلا أبو محمد وينك؟ أرد عليه بكل هدوء:(جاي ياعم جاي)
 قلت بقلبي: إيه تعرف متى تقول أبو محمد قبل أمس جايك اتقهوى عندك استقبلتني بـ:جعل وجهك يلحس وينك لك اسبوعين ماجيت تسلم !

ركبت السياره شغلت أغنيتي اللي ما أسمعها الا وأنا رايح لعزايم عمي,
 المطرب يغني:قصة حياتي عذاب إنسان يوم آتذكر لياليها,وأنا كني كورال أرد وراه وانا أتعبّر وزي كل مره اذا وصل المقطع(مازان وقتي أبد مازان)
أقصر الصوتوأهاوش:
شلون يزين وقتك وأنت كنّك قهوجي كل عزيمه تدق سلف تروح تصب
 وطول الخط أدعي ان الشايب اللي دايم محوم كبدي مايكون موجود الشايب هذا مفروض يدخلني نادي على حسابه يبيلي لياقه عشان أصب له القهوه لعنبوه ماشاء الله أصب الفنجال  له ..مايمديني اصب للي جنبه الا هو ماد فنجاله يبيني أصب
 والله مرات أطل ورى الكنب اللي قاعد عليه أحسه يكب القهوه مايشربها بس عناد يبي يكرفني!!
/
/
 انسى الشايب المدمن وأتذكر  الشايب  اللي مسوي  ظريف مع الصغار
 أضحك اقول اكيد ان فلان بيمسك بزر ويقوله أنت ولد هيا, أسم امك هيا
 ويمسك خط ذا الشايب أحسه حاط براسه مايسكت الا اذا سمع كل الاستراحات
 اللي حولنا يردون بصوت واحد:(أسسسسسم أوووومه هااااايااااااااااا) !ِ
/
/
وأكيد بلقى ذاك  البزر البثر اللي يذكرني في ولد خالتي وهو بزر,مخابيه كلها حلويات وخشته وسخه  خد لونه أحمر من غزل البنات وخد  فيه بقايا شيبس,خشته تجيب الهم لدرجة إني لو أشوف واحد مايقرب لنا يجلد ذا البزر ويصيح, ماني راحمه
أحس اني بصيح مو رحمه فيه,نرفزه منّه
 واقول: أحسسسسسن أحسسسن  أجلده صح ياكلب 

وصلت الإستراحه
 أول شخص شفته البزر اللي يذكرني في ولد خالتي 
(هذره للحين مصر تكذب قل أنه يذكرك فيك وانت صغير لاتظلم ولد خالتك)!!
,طيب آسف بعترف البزر هذا يذكرني فيني أنا,
بس لإني حاقد على ولد خالتي وهو صغير كان مرتب والحريم بس يمطخون فيه .
 خدوده تمتلي من الروج وانا واقف أوزع ابتسامات ومحد يعبرني والسبه مخاطيني والايس كريم اللي واصل اذني 

..ناظرني البزر ويبتسم لكن المره هذي شكله غير عن المره اللي راحت,لأنه مزكوم وخشمه يسيل!! مريت من عنده ولاعبرته
( قلت فـ قلبي  تبيني أبوسك وأسلم؟هها, تسمع بها جرب اللي جربته وانا كبرك)
,حسيت فيه صوت مشي وراي,  البزر: ياحرامي رجع فلوسنا !
تجاهلت التهمه اللي توجهت لي من ذا البزر الوسيم...

أقبلت ع المدخل, شباب المستقبل عند العتبه مجتمعين.. أبيخ مرحله بالعمر
(مرحلة البلوغ)اللي يجيك خشمه جامع جميع الاشكال الهندسيه جهه كبير وجهه لا..طبعاً الفئه هذي أتعاطف معهم لأني مجرب معاناتهم

المرحله هذي أكرها لأن:
الرجال مايعطونك وجه والحريم يتغطون عنّك وأنت مسوي كبير حاقر اللي اصغر منّك
يعني الوضع مزري الحمد لله ماشبيت بنفسي ذاك العمر

سلمت عليهم طبعاً الفئه هذي إذا  استهبلت عليهم قلت ها احتلمت بلغت؟يزعلون يخزونك بنظره  تحس إنك انت اللي توك امس محتلم
 (يخلونك تشك تسأل نفسك مين أكبر انا أو هم)؟! ِ

وقمة سعادتهم إذا ناظرتهم وجلست تغمز وتقول:
 أرحموا أنفسكم خففوا من الغزل والتشبيك أرفقوا ع البنات
من زود فرحتهم مايردون يعجزون عن التعبير ماتشوف الا ابتسامات ,
وسمعتك يالشاب متوقفه على الفئه هذي يعني اذا حقدوا عليك يمديهم يغسلون شراعك عند الجماعه..لأنهم بمرحله التنبيه والتحذير..
 يعني عقب العزيمه  يمكن  أمه تنصحه عن التدخين يشطح شطحه يبي يبيّن أنه عاقل يقول: أصلا تدرين يمه يوم العزيمه هذيك شفت هذره يدخن والله استحقرته !!!
(يالعن ابوك ياكلب يانصاب هذره شايفك عند برميل الزباله مبوبز وتدخن  كنك قطو يدور أكل ,ومافضحك تروح تطلع عليه كلام)!ِ
ولأني حذر وأتجنب  هالفئه القذره(حاقد عليهم)عطيتهم جوّهم ومشيت


دخلت الباب فيه شخص معطيني ظهره عند بيت الشعر اووه هذا عبدالله صار لي سنه ماشفته وبما أني بمجتمع مايعترف بالأسامي راح أناديه بعيارته
(زحلووط يالله حيّه)هلااااااااااا حنيني (على طول يعّير الكلب, ماكن لي أسم)
وبعد  سلام حار مرّ بزر من عندنا معروف انه مؤدب وكالعاده زحلوط جلس يمارس هوايته اللي من خمس سنوات طايح فيها
طبعا كلكم تعرفون السؤال هذا زين تقريباً أكثر سؤال يسمعه الطفل وهو صغير :ها يَ بطل إذا كبرت وش تبي تصير؟
 يجاوب البزر بكل ثقه(طيار&دكتور&مهندس&ضابط)هذي هي هواية زحلوط وأهم شي عنده الجواب يكون دكتور !!! 
من عرفته يسأل البزارين المشكله فيه ناس كبروا وتخرجوا وتوظفوا وزحلوط مازال عاطل 

 مسك زحلوط الولد المؤدب(أنظف بزر بالعزيمه)وسأله:وش ودك تصير يابطل؟
 خش عرض بزر بثر  جاوب وهو مطير عيونه واللعانه تطوشر من بؤبؤته
أنا بصير ضابط
أبتسم زحلوط قال:كفوووو طبعاً يرفع فيه يبيه يفكه من شرّه ومن بثارته
 راح البزر اللعين للشله على طريقة درايفر يلف يدينه يمين ويسار كنه يفحط
 قلت بقلبي(افلقني ان صرت ضابط)!!

رجع يسأل الطفل المؤدب الهادي اللي مثلي وانا صغير(رجعنا نكذب ياهذره؟)

"قريني وسخ كل مامدحت نفسي يقول قل غيرها"يجحد العشره والدشره..

 سألنا المؤدب وش تبي تصير؟ قال:ابي اصير دكتور وكالعاده زحلوط ينتظر هالجواب
 راح مسرع لأبو الولد ,
ماشاء على ولدك تو أسأله اقول وش ودك تصير إذا كبرت
 قال: دكتور عشان احط لأبوي ....
يقاطعه أبو الولد أكمل عنّك؟ أحط لأبوي تحميله واعالجه من البواسير !!
,طبعاً باللحظه هذي زحلوط متشقق قمة السعاده الحين هو عايشها
 ونفس وضعيته طول السنين(حاط يدينه على بطنه ومدنّق ويضحك)
بس اللي ميحرني شلون مامل من الهوايه؟
 يعني انا اذا جاني ولد ان شاء الله  ورحنا لعزيمه 
 بقوله اذا جاك زحلوط قل بصير دكتور واكيد بيجي يقول سألت ولدك
 قال دكتور عشان يحط لك تحميله ويعالجك من البواسير !!
 (باللحظه هذي تذكرت عمي وهو يقول  لازم تجي لاتنقدنا يقولون هذا راعي بلاوي) آآهـ ياعمي والله أن طحت بالبلاوي السبب من زحلوط

كل اللي صار وأنا اشوف عمي يناظرني من بعيد
 باين أنه يقول بقلبه (جعل وجهك يلحس ورى ماتجي تصب)أتجهت للمجلس وأنا أسوي حركات إحماء أرفع يديني قدام وأرجعها عشان الشايب مايرهقني
دخلت بصوت عالي: السلاااامو عليكوووم والرد من كل صوب:
 وعل عليكم سلا السلام وعليكم الام السلام(ماسمعت وعليكم السلام من كثرهم أسمع الرد متجزء)

وزي كل مره أبوعبدالمجيد سلم علي بعدها سألني:
 أنت ميمي؟(وكالعاده أضحك: لا أنا حنيني) يرد أبو عبدالمجيد: إيييه
 لا بس أحسبك نسيت عيارتك!!


 وبعد السلام كالعاده وين الدله قضبوني اياها
..تقهو يبو فلان عشت ..تقهو بسسس..وعلى هالحال إلين وصلت الشايب المدمن مديت الفنجال تقهو..ساحب علي !!
 المشكله أنه يشوفني كل شوي يلتفت وهو يضحك ويكمل إيه اقولك يبو فلان !! يشوفني ويرجع يكمل سالفته اخيرا مد يدّه صبيت له
.رحت للي جنبه ,تقهو يبو عبدالمجيد ومطنش
 طبعا الفنجال أحطه على راحة يدي يعني انواع الحراره قلت معقوله ماسمع؟!
 عدت الجمله لكن بنبره حاده وعاليه: يبو عبدالمجيد تقهووووو
 ناظرني وهو يضحك:حرتك؟؟
 والفنجال مازال يحرّ. أبي ابتسم ماقدر, مقدر أجامل قلت: تقهوو بس
 خذا الفنجال وقال: أحسن عشان ماتنسى عيارتك؟!
طبعا اللي جنبه أبوي فـ نغز ابوي مع جنبه وقال ولا يبو فهد؟ قال ابوي تسوته؟
 قال إيه..الرد من ابوي : احسن عشان ماينسى عيارته ويضحكون 
 ..طبعاً اللقطه هذي كل عزيمه تصير!!

وبعد ساعتين  من القهاوي ..قلطوا الضيوف للعشا..عمي يناظرني وهو مبتسم كنّه يقول تقدر تروح لبيت الشعر عند الشباب
بادلته الإبتسامه طلعت المجلس ..
 أسمع صوت من هذيك الزاويه
(ياخي جاكرتا أحسن وأرخص أمش خلنا نروح نخربها ونرجع)
أكيد(أنهم المفسدون فـ الارض) واللي يتلكم عن جاكرتا  أحمد
 هذي العزيمه الثالثه اللي أحضرها خلال هالسنه وكل عزيمه يقنع نفس الشخص يروحون يخربون جاكرتا مدري متى بيروح ويفكنا والمشكله مايقول بنروح نتمشى يبي يخرب ويرجع


أنتبهوا لي,  كالعاده أحمد:حنيني تخاويني نخرب جاكرتا؟
 هذا زلابه خاوني أنت
 رديت عليه: الزلابه والله أنت ووجهك لا منيب مخاويك ياخي  حايمه كبدي من الفنسا اللي في بيتنا أروح لديرتها ناقص عاهات أنا؟

 أحمد وبعصبيه: أجل وين تبي تروح تبي اوروبا؟؟ياخي وجهك مايقبلونه هناك لازم تهريب !!ويضحكون الشلّه وبصوت واحد آآآه وجهه يبيله تهريب ويرجعون يضحكوون !!
(تذكرت  إني بمجتمع مايرحم اللي مايرد ويذب يصير ضحيه الين يسري)
أبتسمت قلت: حلوه بس ما أقبلها من واحد وجهه يبيله بروكسي عشان تبين ملامحه والشله الوسخه يضحكون وسرعان ماقلبوا على أحمد وبصوت واحد:
 آآآه هههههه وجهه لايمكن العثور على هذه الصفحه  آآه والله قويييه

,يقاطعنا عمّي  يالله اقلطوا تعشوا ....يالله يالله  وراك  اسبقنا ..ويبدأ صراخ الشيبان وهم قالطين
  كل واحد لقمته بـ فمه وينادي:
 أمجو تعجو (أمشوا تعشوا لكن اللقمه اللي بفمهم تخلي الـ"ش""ج")
قلطنا ع العشا 
بالسفره اللي على يميني الفئه اللي أخاف منها.. واحد منهم  حاط الموزه ع الذنبه والثاني  يخبطها ويعض ع براطمه من قو الشهوه  !
.طبعا أنا اناظرهم بنص عين مابيهم يدرون إني شفتهم ثم يتهموني يخلوني أنا اللي مسويها !!
فجأه وأنا آكل ..شايب يقطع لحم ويحطه فـ (شنقي)
 أو
(كثري) 
أو
(مدري ماعرف الا ذا الثنتين )!!

 فرقت بين أصابعي خمشت لي رز واجد,وأرجع يدي لـ ورى بشويش,عشان أدف اللحمه بالرز وتطيح ع السفره,
أول لقمه لي رز بدون لحم
 أختلست النظر للشايب اللي قطع لي اللحمه  أشوفه وهو يدف لقمته بإبهامه وباقي اصابعه يدف فيها الرز اللي ناشب بشنبه !!ِ
اللقمه الثانيه عدت على خير من قدي لحمه قاطعها أنا
..باقي العشى كلته بدون لحم !!
أحمد انتبه لي نغزني مع جنبي قال:شفيك؟ قلت حامت كبدي,ضحك أحمد وهمس بأذني: مبروك حامل وكمل ضحكه ويغمز للشباب يعني تراني صلخته!
قمت من العشا أكرمكم الله وكثر خيركم !! 

رحت المغاسل وأنا أغسل جاني(خلق الله حسن):
تعريف مبسط لـ (خلق الله حسن): وجهه كنه الحلقه الأخيره يجيب الغلقه  يعني مواصفات جماليه أنسى تلقاها بوجهه الجمال معطي وجهه إقنورغالبا بالاجتماعات تلقاه عقب العشا وبكثره عشان التدخين.

 قال:حنيني يبيلنا زقاره تكمخ بروسنا قلت يالله جايك,مشى الكائن المسخوط ينتظرني برى
وأنا اقول في نفسي(أجل زقاره تكمخنا لعنبوك انت وجهك يصحي السكران مهوب كمخت زقاره)
توجهت له عند الباب ندخن وبعد كم موشه جو الشلّه اللي يحبون يخربون دول الخارج ويرجعون

أحمد:شفيك قمت من العشا؟ قلت:الحمد لله شبعت تبيني اقعد للفجر؟؟
قال: نصاب ماشبعت  تبي اعلمهم ليش قمت؟
 تراه قام عشاني سألته شفيك قال حايمه كبدي قلت مبروك حامل
 ..والمفسدين بالأرض(آآه صلخه قومه من العشاا)!!

 كلهم عادي يضحكون بس(خلق الله حسن لايضحك)
قلت انت وش يضحكك؟ قال:ماشاء الله بأي شهر بس؟ كالعاده جلس يضحك لحاله,
المفسدين بالأرض  بصوت واحد:يعععع بايخه خلوه يدخن ويسري لبيتهم
.قلت: لاتشرهون عليه الشرهه على البلديه قالوا ليش؟
 قلت هذا اول ما انولد مكتوب على جبهته إتلاف خارج المدينه.
.المفسدين:آآآه ههههه أنقلع طف زقارتك رح لبيتكم صلخك والله مصخررره
 (تحس أنهم يضحكون بنجاسه أكثر من أنهم يضحكون لأن الذبه أعجبتهم)ِ
أنا  مليت خلاص لو أقعد زوود برتكب جريمه

قلت شوي وأجيكم (الحين جا دوري أمارس هوايتي)رحت للصغار العب معهم 
,والبزر البثر مازال يردد: رجع فلوسي رجع فلوسي !!
عطيته عشره ريال قلت رح جب كوره من البقاله خلنا نلعب
 راح يركض وهو يقول انا هجوم انا هجوم تأكدت أنه صار بعيد وصوته راح
ما أسمع الا: (أووم أووم)عرفت أنه يقول: انا هجوم 
 أستفردت بالمخفات قلت بنلعب لعبة الساحر
 قالوا: زي  المره اللي راحت؟ قلت ايه ..طبعاً اللعبه هذي لازم يكون معي مساعد
  اللي هو (المصري)وينك يالمصري تعال
 جا يبتسم : الله يلعنك حرام غمزت له قلت صح السحر حرام بس بتوب أنا بعدين ..
طلعت 50 ريال حطيتها بيدي اليمين قلت من يلعب؟جا دلوع بابا وماما قال أنا بلعب قلت يالله جب 100 ريال
  حطيتها بيدي اليسار  قلت: الحين اخليك تختار اذا عرفت وين الـ  100 أنت فايز  وخبيتهم ورى ظهري
..الحين دور مساعدي..ياخذ الميه ويحط بدالها خمسين..مديت يديني للبزر قلت يالله وين الـ100؟ هنا ولا هنا؟
 إذا صار صح عليك تاخذها واعطيك خمسين ريال جائزه ..أختار اليمين قلت خطأ  شف موب 100 يالله حاول مره ثانيه
 قال دقيقه بروح لأبوي ..طبعا انا ماوقف اللعبه أروح للي بعده وبعده حتى الطفارى اللي مامعهم الا ريال أنصب عليهم..
رجع الدلوع ومعه 100 قال معي  بلعب قلت يالله بالحاله هذي أنا أغريه طلعت 500 وحطيتها بيدي وخذت 100 قلت اذا عرفت وين الـ500 تصير لك جا دور مساعدي خذا الـ 500 وحط 100 قلت يالله أختر..

باللحظه هذي وصل اللي يذكرني فيني وانا بزر.وهو يركض من بعيد يصارخ يالله بنلعب بنلعب أنا هجوم انا هجوم
محد عطاه وجه..وقف قال وش تسوون؟ تجاهلت سؤاله
 قلت يالله أختر.قاطعني البثر :تراه نصاب حرامي حرامي  خله يوريك يدينه!!
(شكله قايل لأبوه المره اللي راحت وعلمه)
والبزارين كلهم صاروا يردون وراه أفتح يدك ورنا يانصاب!!!
 خذت الكوره سطحتها بالاستراحه اللي جنبنا
قلت لهم اللي يجلد حمودي(البثر)بعطيه 500,نسوا أني سرقتهم وجلسوا يجلدونه وكل شوي تسمع واحد يصيح جا شايب يهاوشهم أنا أستغليت الوضع ورحت بخطوات سريعه لسيارتي شغلتها
 أشتغل المسجل ومازال المقطع(قصة حياتي عذا)ماخليته يكمل المقطع
طلعت السي دي رميته
 حطيت فريد الأطرش(الحياة حلوه بس نفهمها)
 وأرد وراه وأنا أعد كم الفلوس اللي طلعت بها من البزارين .
//
مادُمت مجبراً فـ أستمتع !


هناك 19 تعليقًا:

  1. هههههههههههـ يانصابَ رجع فلوسهمَ خخخخ
    ماتوقعت ان الصبيان يعانون مثل البنات
    ياكرهي للعزايم لين صار فيها عجزَ يحوم الكبد قسم بالله
    ولازم نقعد معهمَ ونسولفَ معهم هم وسوالفهم السامجةَ
    ثلاثة ارباعها حش بام فلانه وام علانة وحنا الضحيةَ
    حسيتَ بمعانات اخواني كل عزيمة مايحضرون اللي يروح
    استراحة واللي يسافر واللي معزوم عند شباب وانا
    كنت اقول والله ياخوانيِ صايعين اثاريهم يعانون مساكين
    هههههههههههههههههه
    بس جدَ جبتهاَ عالجرحَ واتوقعَ هاذيِ يوميات الشعبَ السعوديِ كله
    الله يصبركم يالسعوديينَ >> اوب سعوديةَ هع
    بالبدايةَ رحمتكَ شوي واقعدَ ابكي
    يوم وصلت للاخير قلت يستاهل هالنصاب عاد كلش ولا اليهال لباهم هههههههههه
    بس والله وسعةَ صدورناَ انقطع نفسي من الضحك لول >> برا
    استمرَ بس وش معنى القايله ؟! >> فهاوه معليش هوع

    ردحذف
  2. غير معرفمارس 12, 2011

    أما طريقة ابوك اعجبتني طقتين يقول أسمك بعدين طقطقطقطقطقطق ههههههههههههههههههههههههههههههههههههههه تصدق أعجبتني حركة متى تعترفون خخخخخ بسويها أما البثر اللي لو يطقونه تصيح من الغبنه وتقول أحسن ههههههههههههههههههههههههههههههههههههههههههههههههههههههههههه والله دايم اتمنى ينجلدون مرات أتنرفز من الصغار بس مقدر اسوي شي ودي احد يجلدهم ويبرد قلبي
    والله معاناتنا يالبنات أكثر منكم أحمد ربك أنتو بس شماغ وثوب وقهوه وشاي انا افكر انتحر بس عشان محتاره مدري شلبس واذا رحنا تلقى كم وحده يتساسرون ويطالعون فيك انا ادري انهم يحشون فيني بس اسوي نفسي ما انتبهت اخليهم يكملون وانا مطرطعه من داخل أحس ان فيني شي غبي بس حرام عليك تقول اللي توهم بالغين خشومهم جامعه كل الاشكال ههههههههههههههههه أستغفر الله

    موتني ضحك يالقهوجي الله يسعدك بس عندي سؤال نفس اللي قبلي شمعنى قايله ؟

    ردحذف
  3. الله يرجك ويخضك في خلاط اسمنت
    وربي فقعت ضحك اسلوبك خطير
    وخشيت جو كاني حضرت العزيمه
    بس على فكره احمد ربك انك مو بنت
    لانك لو انك بنت كان تحضر سفرة العشا وتصب للحريم وتوقف في المطبخ وانت على سنقه عشره


    مع تحيات الرشيقه ذات القوام الممشوق

    ردحذف
  4. هههههههههههههههههههههههه أجل صرت قهوجي وأنا مدري ايه ياهذره الله يعين اللي يصبون انا الحمد لله مريح نفسي اخوي اللي أصغر مني هو اللي طايحه براسه بالنسبه للشايب اللي متعبك عندنا وعندك خير فيه نوعيات من ذا الشايب حسبي الله على بليسك والله ياضحكت ضحك يومك تطل ورى الكنب لنك تحس انه يكب القهوه ومايشربها بس يبي يتعبك هههههههههههههههههه
    بس أهنيك على ردك للي قال أن وجهك يبيله تهريب هههههه
    وش ذا قسم بالله ودي أجضر عزيمه من عزايم عمك أحس بضحك من أدخل لين أطلع وش ذا العائله اللي مايعترفون الا بالعيارات ههههههه جاز لي مسمى زحلوط بقولها لواحد من اخواني ماشاء الله عليك لاحظت على تدويناتك تربط نهاية القصه أو التدوينه بـ عنوانها أو بدايتها ظلمت نفسك يوم انقطعت عن الكتابه بالمنتديات وحرمتنا انتظر جديدك

    ردحذف
  5. غير معرفمارس 18, 2011

    هههههههههههههههههههههههههههههههههههههههه
    الله يقلع بليسك توني أدري أنك مسوي مدونه جديده دخلت مدونتك القديمه أستغربت أنها فاضيه اثاريك شديت لبيت جديد منزل مبارك ياهذره

    المراهقين اللي حاطين الموزه ع الذنبه يووه ياقدم الحركه أنا أحلف أنك كنت تسويها ياهذره وأتحداك تنكر هههه بس صراحه مالوم الحريم يومك صغير مايبوسونك أجل خشتك وسخه خد غزل بنات وخد بقايا شيبس هههههه مالومك تحقد عليه ههههههههههههههه والله اني استغربت وأنت تقول يذكرني بولد خالتي شكيت بس أشوى أن قرينك مايتقبل أنك تنصب وتسوي نفسك كيوت

    تحياتي واشواقي: عـز الخالدي

    ردحذف
  6. زحمة حكي/
    لا والله ماني مرجعها هذي ضريبة مقابلهم والله العجز اللي وش حليلهم جلستهم تجمع انواع الترفيه فترة حش وفترة سوالف مرعبه عن الشغالات وفتره عن إنحراف الشباب وفترة يقلبون دين يعني الموجه كل شوي تتغير عندهم أما الرجال مافيه الا قوة نصب يجيك شايب يقول نكته لكن مايعترف أنها نكته يقول صايره له هو وأخوياه !!!
    والقايله هي وقت الظهر يالمفهيه
    //
    مجهوله:
    شكل اهلك اذا جو يصحونك نفس الطريقه اللي يصحوني فيها ولا ماضحكتي هالضحك هههههه ياحظك أجل شغلك الشاغل بس الحيره بإختيار خلاقينك؟ البسي أي شي مفروض ماتفرق معك هذاك تطولين وتتحمسين آخرتها يطالعون فيك ويكلمون بعض يتهزون فيك هههههه وصدقيني ماطالعوا فيك الا وفيك شي غلط يمكن الروج من الحماس مشيتيه على شفايفك ووصل الين صوان اذنك ^_^
    والقايله هي الظهر

    ردحذف
  7. كل ماتجدونه هنا:
    رُجـِجتي يافتاة
    بس باين انك سنعه وهبة ريح لأنك تشيلين هم العزيمه عشان تحضير السفره والقهاوي .. مهوب مثل اللي شايله هم خلاقينها ومن زوده تقول يناظروني(أكيد بيناظرونك ويتهزون بوجهك اللي مايندرى هو رايح ولا جاي ليتها بس توصف بيتها أخلي خلق الله حسن يتقدم لها)
    هههههههههه
    حيآك الله يا ذات القوام المدلقم ومليان مشق
    //

    تعرفني بعدين:
    عرفتك يالمخنز من ريحتك ,الصفحه صارت ريحتها خثي !!
    أحمد ربك أن عندك أخو صغير بلاك من اللي عيال أمه أصغر واحد فيهم عمره 33 :( ومن ناحية حضورك حياك الله بس ما أنصحك صدقني بتطلع متحطم ومعدومه ثقتك بنفسك خصوصا أن وجهك أرض خصبه للذب مع أنك أنت ماتحتاج عياره لأنك بكبرك عياره يعني لو بتهزى بواحد بقوله أنت ووجهك ذا اللي كنه(وأقول أسمك)ههههههههههه
    اشكرك يالعاهه على اطرائك بس بالنسبه للملاحظه مفروض أنك تكون عارف أسلوبي لأني دايم أربط بين وجهك وقفاك, أدري أنك تقول يالعن شكله ذا الكلب جالس يسفل وأنا مبطي عنه بس من حبك سبك لبى قلبك
    ///

    عـز :
    يبارك بعمرك ايه هذيك تركتها لأن ريحت(تعرفني بعدين لزقة فيها),!
    أما حركة الذنبه أنت تحس أنها ققديمه لكن صدقني مازالت موجوده للوثت هذا هذا اللي فالحين فيه نورث بزارينا قلة الأدب , ليه ماتلوم الحريم بالعكس ياخي توني صغير مفروض يبوسوني ويتحملون وساختي ومخاطيني السايحه اللي ما أحس أنها ساحت الا وصلت فمي ومن نظافتي أطلع لساني والحس شفتي بزعمي أني خلاص مشيت خشمي وصرت نظيف ومايمديها تمر ثلاث ثواني الا هي سايحه من جديد وعلى ذا الحال أجلس طول الوقت أجاري مخاطيني ياما لحستها وياما ساحت الين تيبس خشتي وينسد خشمي من الهوااللي يلفحه.
    تحياتي الحاره انا وبنات الحاره

    ردحذف
  8. هههههههههههههههه العن شكلك ياكلب احترمني من زمان عنك أقلها جامل لكن أنت ماينفع معك أجل ريحتي خثي ؟ أحسن من اللي ريحته طحال يالمخنز المهم يالمشوه انت وش وضعك كل شي مغيره حتى ايميلك ماعاد اشوفك فيه ضفني بيميلك الجديد مع أنك وجه نكبه يمكن تجيب لي المصايب اذا ضفتني

    ردحذف
  9. غير معرفمارس 27, 2011

    معاناة ياهذره الله يعينك احتسب الاجر واذا تبي اجلد الشايب مدمن القهوه عطني خبر ابرد قلبك
    بس تدري عاد كل شي حسيت أنه يهون عند طريقة ابوك اذا جا يقعدك من النوم وربي لأنمتحر لو يصير لي مثلك بعدين صدق ماقلت لنا كم طلع اجمالي الربح من البزارين ؟

    ردحذف
  10. تعرفني

    إيه كل شي مغيره يالزقة عنزروت والظاهر اني بسحب على هالمدونه والسبب ريحتك .. ياخي كرهتني بعيشتي أول احسبك مملوح ومرتب بس صدق أن النت يصنع خيالات غير عن الواقع يالعن شكلك للحين أذكر ريحة فمك يوم سلمت عليك كني فاك علبة ساردين وشامها,,أعذرني منيب ضايفك يالبومه أنت تجيب النحس تكفى خلك بعيد ههههههههههههه

    ردحذف
  11. غير معرفمايو 14, 2011

    هههههههههههههههههههههههههههههههه
    ههههههههههههههههههههههههههههه
    ههههههههههههههههههههههههههههههههه

    والله معاناة ياهذره بس اهم شي انك تسمع اغنية فريد وأنت تعد الفلوس قاعده اتخيل شكلك احسك مبتسم وحاس ان الحياه ممتعه ههههههه

    امضاء:مدرسة الغفله :(

    ردحذف
  12. -

    ههههههههههههههههههههههههه

    عزييمة خطيرررررره والله اندمججججت معآهـآ آقووى شي

    = )

    ردحذف
  13. غير معرفيوليو 20, 2011

    قسم بالله ماخاب ظني فيك يوم قريت لك رد واحد دريت انك مهووي و بايعها بريال ..فديت خشتك من جد سوالفك تجيب العافيه......ودي ادري بس يوزرك بالحارة هو انتحاري ولا ؟

    ردحذف
  14. مدرسة الغفله .... أكيد أبتسم وماعتبر هالدراهم حرام هذي ضريبة مقابلهم
    --------------------------------
    ωϊsнєs

    أهم شي اندمجتي ... بس عندي سؤال.. الحين اذا قلتي معاها فمك ينفتح وراسك لا ارادي يرتفع لفوق ؟ ولا عادي زي اذا قلنا معها ؟!!

    ردحذف
  15. غير معرف /

    اهم شي اني ماخيبت ظنك ,فديت خشيمك,,وعافاك الله ورحم والديك
    بالنسبه ليوزري بحارة المساطيل .. ماهوب إنتحاري هذا يوزري الوحيد سجلت فيه أيام صجة البلوي والهلال .. نزلت موضوع وتلاقطت مع النصراويين والاتحاديين ,, ههههه عقبها ماعاد دخلوا الاعضاء اللي اعرفهم واحب اجلدهم
    ومن ذيك السنه وانا ادخل اقرى واذا شفت شي يشدني رديت.. بتأني وحذر
    لأن الحارة من تالي تحس انها الفلوجه كل ماطق عودن حصاة قالوا انتحاري, أخاف أرد على واحد وأشب عليه يقولون أعترف من انت يالزلابه ادخل بيوزرك ض1


    ألا صدق علمني من أنت؟ طيب تصير صديقي عشان تمشيني بالحارةويشوفوني معك ويدرون اني مانيب انتحاري؟ ههههههه

    ردحذف
  16. غير معرفيوليو 23, 2011

    ههههههههههههههههههههههههههههههه ، حنيني قسسم ب الله صرت أضحك وانا توني في الصفحه الرئيسيه لمدونتك ، أسسلوبك يخليني اضحك غصب عني ،
    تقسسيمك لفئات المجتمع رهييييب ، خصوصاً شلة ( الذب ) صصلخه ، قتله ، ذبححه ، رووح موووت << سلامات يابوي هذولي إللي فاهمين التعزيز غللط .
    الموضضوع كله على بعضضه رهيييب ، بس تدري وش إللي خلا ضلوعي توججعني من كثرة الضحك ! [ امجوا تعجوا ] ههههههههههههههههههه وقسسم ب الله كني اشوفهم الحين وصصفك خطيييير يارجل ،
    دام ذا العياره كلها في راسسك ليش ماتنزل مواضيعك في المساطيل ؟!
    أسسسلوبك ممتع لدرجة إني قريت مدونتك كلها في ساعتين ض١ ،

    مجهول/ ة المساطيل << مثل ماسميتني ض١  

    ردحذف
  17. مجهول المساطيل/
    طيب لاتعيّر.. او بكيفك عيرني بس بشرط ياتعلمني عيارتك أو توريني وجهك وأظمن لك اركب عليك عياره على كيفك,, واضحك الين تبلع لهاتك,ياعسى الدنيا تضحك لك ..
    وبالنسبه لـ (أمجو تعجو) احمد ربك ماشفت الوجيه جالس تقرأ الوصف وتضحك ماتدري ان دقة الوصف من ضيقتـ(ن) فيني ,, يجيك شايب توه حاط اللقمه وهو ينادي تشوف الرز يناقز على براطمه ومن زود الثقه يناديك يبيك تصير جنبه (لعنبوه والله لو اني جاي من الصومال واشوف الرز اللي يشكشك على براطمه ماقلطت)

    أما تنزيل المواضيع ياطويل العمر المنتديات يبيلها فضاوه وانا مافيني حيل اصالي,, صاليت المنتديات الين قمت اتاغر مواضيع وأنثر ردود ض1

    لاخلا ولا عدم يامسطول

    ردحذف
  18. خليتني اضحك وصدري ضايق
    الله يوسع صدرك ويسعدك دنيا واخره

    ردحذف
  19. مبسمهاالعذب/ آمين وياك وعسى الدنيا تضحك لك,والله يبعد ضيقتك
    حياك الله

    ردحذف