الأربعاء

رغم أن الشعب السعودي محافظ !!


رغم أن الشعب السعودي محافظ ,كثيراً مانسمع هذه الكلمات ونحن نبتسم إبتاسمة رضاء
وفي نفس الوقت إبتسامة لسان حالها يقول(كثر منها)ِ


قبل أسبوع رجعت من سفرتي ولأن وصولي للرياض كان الساعه 6 صباحاً لم أجد من يستقبلني
 طبعاً(سفرتي كانت للجوف شمال المملكه بجيب لأمي زيت زيتون بس ماحبيت اكتبها على طول عشان أحس أني جاي من امستردام)ِ
ـ آخر من نزل من الطياره أنا وزميلي الراكب الذي بجانبي,وقبل نزولنا من الطائرة رأيت المضيفه ذات القوام الممشوق والعنق فارع الطول ,التي أثناء تحليقي بالهواء عندما قدمت لي الفطور نظرت لها نظرة الـ (ي لبيه) مؤشراُ بيدي إشارة تدل على أنني لا أريد الفطور,ليس لأني شبعان بل لأني أحببت أن تُصر على إطعامي لأنها تنظر إلي مبتسمه لكن للأسف لم تُصر ونفس إبتاسمة تقديم الفطور شاهدتها تبتسمها للراكب الذي بجانبي(والظاهر أن اللي جنبي جاه مغص من عيوني طول ماهو يفطر أطالع فـ أكله وأقول:لوأني داري أنها ماهي معجبه سحبت فطوري منها وأنا مكشر)
وقبل أن نودع هذه الطائره غمز زميل الرحله للمضيفه(رغم أن الشعب السعودي محافظ)!!ِ


غادرنا الطائره وزميلي يسألني:معقوله لو أني بالدرجه الأولى كان رقمتها؟ ياخي شكلها مستحية لأنها ماهزأتني يوم غمزت؟طيب؟وطيب؟ وطيب؟ إلى أن وصلت لسير الأمتعه وفي خضم التساؤلات والفرضيات التي شوشرني بها جاوبته بكل صراحه:يارجال مهوب من زين خشتك عشان تاخذ رقمك,جائني أحد العمال أعطيته رقم الأمتعه جسلت أتأمل المسافرين وأتلفت,لفت إنتباهي سير الأمتعه اللذي خلفي ,هناااك فتاة ملثمه ترتدي عباءة لامعه وضيّقه أعتقد انها لن تستطيع خلعها بسهوله ويستوجب تدخل المقص,ويبدو أنها في الماضي القريب أجرت عملية تجميل لأنفها لأنها عندما أتاها العامل يحمل شنطة السفر(ورغم أن الشعب السعودي محافظ)ِ
سحبت اللثام للأسفل لتخرج أنفها قلت في نفسي:مدري أنتي تشوفين بخشمك يوم تنزلين اللثمه؟أو تشمين ريحة الشنطه هي لك ولالا؟
 ثم رجعت لنفسي فقلت: والمشكله قصيره ومربربه ولابسه عباية ضيقه وتلمع طالعتن كنّك باذنجانه مرشوشن عليها مويه,
بدأت بالتثاوب التفت على سير أمتعتي منتظراً العامل, هاهو  قادم مبتسماً إبتسامة أنستني إبتسامة المضيفه ! وكالعاده عند وصولي لبوابة المستقبلين ينتابني شعور الشهره مرات ودي أتلطم وأركض أحس انهم بيلحقوني تكفى صوره يادحيّم ,سرعان مايذهب شعور الشهره بمجرد أن أتعداهم بأمتار قليله,
ركبت التاكسي وبعد السلام
سألته:كيف الجو هاليومين؟جاوب السائق:الحمد لله الجو من يومين حلو,
قلت:يقولون جاكم غبار بغى يقلبكم مومياء صدق؟
جاوب:إي والله خلها على ربك يارجال
سألته:ماتلاحظ الغبار القوي مايجي الا مع إفتتاح الجنادرية؟
رد ضاحكاً:والله أنك صادق ياخي يقولون صار النون ومايعلمون بالمهرجان
جلست أضحك:مستحيل أحس الناس تبالغ تراك بالسعودية
ما أن قلت هذه الكلمات بدأ سائق التاكسي بالضحك وبدأ بالحديث:تدري قبل فتره ركبوا معي بنتين يسولفون  مع بعض فجأه وحده مهم قالت ولا انا غلطانه؟ يقول رديت عليها:غلطانه بإيش؟ ردت البنت: (ورغم أن الشعب السعودي محافظ) بأنه مفروض يكون فيه إختلاط وصداقات مع رجال بدون غثاء الهيئة
وبعد حديث شيق مع السائق والفتاة
 وقبل نزولهم من السياره(ورغم ان الشعب السعودي محافظ)طلبوا رقم السائق
سألت السائق:خذوا رقمك!ليش عشان المشاوير؟!
ضحك ضحكة إستهزاء:هـه هـه,إيه عشان المشاوير وين لفت بيتكم الأولى ولا الثانيه ؟
 جاوبت: الثانيه,سيطر الصمت على أجواء التاكسي إلى أن وصلت البيت ,حاسبت السائق
وقبل أن أغلق باب السيارة:عاد إذا  دقوا عليك البنات يبون مشوار وأنت مشغول حولهم علي أوصلهم بدون فلوس أحتسب الأجر
,دخلت البيت  سلمت على الوالده لاحظتها أثناء إحتسائنا القهوه نظراتها للشنطة, قلت: شفيك يمّه؟
 ردت:مدري بس أخاف أن الزيت يوصخ شنطتك ماودك تطلعه؟
رديت وأنا أنظر للسقف وأدعك أسفل ذقني: والله يمّه قضت الدراهم  الباقي مايجيب لك ولا زيت عافيه,وبعدين أصلاً لقيتهم مغلين الزيت التنكه بـ850 وجاني علم أن المنتجات الوطنية نلقى فيها زيتون الجوف
رقيت للغرفه أنسدحت أبي أنام ماقدرت أفكر بالجنادرية إتصلت بصديقي مشارك بجناح هيئة الغذاء والدواء ,تحمدلي ع السلامه  على طول قلت :أبي أسيّر عليك بالجنادرية,قال الحين عوائل بس تدري نروح انا وأنت واذا رفضوا يدخلونك قل أنا موظف بهيئة الغذاء وناسي البطاقه وأنا بمشي الفلم معك,وبالفعل رحت مع صديقي ودخلت لكن بدون مانطبق اللي أتفقنا عليه
 لأن محد سألني عن البطاقه,طبعاً هذي زيارتي الأولى للجنادرية وندمت أني ماسبق وأن زرتها لأنه ماهو بعيد عن مهرجان قرطاج !!ولاحظت أن أي جناح مفيد يفتقد للزوار وأي جناح فيه طق وزحمه وإختلاط مليئ بالزوار,
صديقي راعي الدواء والغذاء يهش ذبان بجناحه وحامت كبدي من جناحهم قلت تعال خل نتمشى,
وليتني ماقلت تعال نتمشى..(ورغم أن الشعب السعودي محافظ)هنااك ع اليسار يخرج رجل من خلف الخيمه وهو يعدل ثوبه وخلفه فتاة تعدل طرحتها  أشاروا لبعض إشارة الوداع وتفرقوا!!
التفت لصديقي: شفت اللي شفته؟
 رد ضاحكاً:ماشفت شي من يوم طلعوا الهيئة والمهرجان من جرف لدحديرة,رجعت التفت أراقب رجل الخيمه وفتاة الخيمه شاهدت الرجل يضحك مع أصدقائه وصديقه يضربه على كتفه وكأنه يقول:والله وسويتها  على طريقة الأولين!!
فجأه وأنا أراقب رجل الخيمه صديقي يسحب يدي: شف شف الشايب اللي قدامنا,
نظرت للعايب أمامي وهو يضرب الفتاة التي أمامه من الخلف,
 مره بالخيزران ومره بيده ,(رغم أن الشعب السعودي محافظ)
والفتاة تلتفت للخلف وترفع صوتها ضاحكه:ياشباب أرفعوا يديكم ترى لعبتوا فيني!!
غضب صديقي من تصرف الكهل ضرب على كتفه إذا سمحت: رد الكهل:هلا آمر؟
جاوب صديقي:ماتستحي على وجهك  وش بقيت للمراهقين,
وبكل وقاحه رد الكهل:وش دخلك  أصلاً لو أنك رجال ماتاظر تحت !!
جاوبت عوضاً عن صديقي:وأنت لو أنك رجال ماتلمس وجهك اللي هو قفى الحرمه
,غضب الكهل وبدأ يشتم ويردد: تغلط على واحد كبر أبوك,إلى أن تجمهروا الزوار وأبعدونا عن بعض
همس لي صديقي:تعال خلنا نروح مابي أنكرش بسبة الشايب رجعنا متجهين لجناح الغذاء والدواء
 سألت صديقي: أقول وش ذا الدياثه والمصخره هنا يبيعون أكلات شعبية ولا لحم خنزير؟
 رد صديقي: ههههه والله الظاهر,وصلنا الجناح ساعدت صديقي بهش الذبان,إلى أن أنشغل صديقي
 وأنا غادرت هذا المهرجان الذي يفترض أن يجسد للأجيال الماضي العريق,وليس لتجمّع الجيل الجديد ونقل صورة حيّه عن نسيان الماضي بكل عاداته وتقاليده الإسلامية


وفي طريق العودة للمنزل سألت نفسي:ساعتين وشاهدت كل هذا ماذا لو طالت المده؟معقوله صرنا شعب يحب يلعب على نفسه نبتسم عندما نسمع أو نقرأ(الشعب السعودي المحافظ )والواقع يقول غير مانسمعه ونقرأه
كلنا شاهدنا مقطع الرقص والذي يدل على المكر السيء ،مقطع يغبن من لديه غيرة من الرجال ، لا أشباه الرجال وهم كثر,لا أخفيكم سابقاً كنت أرى أن وجود الهيئه وعدمه واحد لأن الشعب ككل يعتبر جهاز هيئه ينكر المنكر لكن,
 بعد أن شاهدت ماحدث في الجنادرية بعد إنسحاب الهيئة,أدركت بأننا بحاجة لهم ولانستغني عنهم ,ولن نأمن إلا بوجودهم.




ولكي لا أوصف بالمتطرف والصحوي والمنغلق الرجعي أنا لم أعترض على العرضه والخبيتي والسامري لأني أرى في ذلك متعه للزوار ولا مانع من الاستهبال والاستنزال على أنغام (وأنا أرسلت لك جملة مكاتيب ما رديت...يالله عسى منتب على البعد ناويبي)ِ
لكن أعترض وأنمرض وأغتث ومن الغبن ألهث لأننا لانفرق بين الإفراط والتفريط,
و لأن ماشاهدناه لايدل على فرح وإستهبال بل على دياثه وإنحلال
,البنت فاصخه العبايه مبسوطه بالجلابية طالعتن كنها زولية بيت شعر ومن زود الاستنزال ترجع على ورى مابقى رجال ماخبطت فيه,,والرجال مسوي بريئ  يتنكس ليله سرى جهرا والعين ترى متجه يسار لجهة البنات ويديه تلعب باللي هو يبيه !!!
هل هذا تراثنا؟ الرقص والتبرج وملاصقة الرجال الغرباء؟إذا مفترض أن لانستغرب زوال النعم ونزول النقم
ومع كل ماحدث مازلت أقول(أن الشعب السعودي محافظ وديّن)وماشاهدناه فئة قليلة لكنها مثل السوس ستنخر مجتمعنا إن  لم نجتثها بجذورها.
أسأل الله أن يبرم لهذه الأمة أمر رشد يعز فيه أهل الطاعة ويهدي فيه أهل المعصية ويؤمر فيه بالمعروف وينهى فيه عن المنكر.

هناك 44 تعليقًا:

  1. المشكله عند اللي مسوين منفتحين أنهم على قولتك مايعرفون الفرق بين الافراط والتفريط حمير تناهق بكل حفل فاهمين الإنفتاح غلط متناسين أن دينهم الاسلام
    الله لايوفق اللي منع الهيئه
    مهزله×مهزله ما بقى الا يفصخون عبيهم ويرقصون بقمصان نوم واللي يرقص ومعه عصا حلات من خذا العصا وجلده فيها المقاطع اللي شفناها دياثه وعدم غيره الظاهر أنه صدق غير الأكلات الشعبية فيه لحم خنازير

    ردحذف
  2. السلام عليكم ورحمة الله وبركاتهـ ..~

    في البدايه حابه اشكرك بجد لانو مدونتك ظهرت في الوقت المناسب
    الدنيا ضايقه فيا وضغط الدرساه وغيرها ..!
    بجد مدونتك كانت محطه جميله للترويح عن النفس باسلوبك العفوي واللطيف 

    اما بالنسبه لهذي التدوينه ..
    انا سمعت كثير عن اللي يصير في الجنادريه بس بحكم اني من سكان جده ما قدرت ازورها
    لاني عمري فحياتي ما اصدق شي ما شفتو ..~
    بس من جد كثر الكلام عن هذا الموضوع غير مقاطع الفيديو على اليوتيوب
    صدمت بالفعل صدمت ..!
    مهما اتكلم هنا يمكن صوتي ما راح يوصل لا احد
    بس مالنا الا نصلح في نفسنا وفي الناس اللي حوالينا
    وكلنا  اصحاب اخوان بيوت مدن وانشاء الله يجي الليوم اللي اشوف فيلو عزتنا ترجع 
    عزتنا باسلامنا ورقينا باخلاقنا ..!

    والله يهدي الجميع ..~
    اعتذر عالاطاله .. موفق اخي =)

    ردحذف
  3. السلام عليكم هذره ... شفيك تدويناتك بالقطاره :@
    ياخي أنت حتى وأنت معصب وتكتب بجديه تجبرني أضحك المره اللي راحت قلت لك أفكر اصادقك الحين لا خلاص قررت أصير صديقك :)
    أعجبني وصفك للمربربه أم عباة مخصره هههههههههههههههههه أجل كنها بيدجانه مغسوله بما هههههههههههههههههههههههههههههههههههههههههههههههه
    أما سالفة أن الشعب محافظ يارجال خلها على ربك والله يالشعب منحرف وبقووه إلا من رحم ربك
    وبالنسبه للجنادرية
    أعرف أنها للتراث انا لم أرى تراث مثل هذا من قبل و يبدو لي أنه مرقص مسرح+اله موسيقيه+بنات يرقصون ماناقص ألا إهدائات(وأحلى تحيه لفلان)وتنقيط
    ومثل ماقلت كلنا كنا نشوف أن الهيئه وجودها وعدمها واحد لكن بعد اللي سمعناه وشفناه بالجنادريه أتوقع أن الكل عرف قيمة هيئة الأمر بالمعروف
    وداعاً ياصديقي الجديد (فيس يبوس)

    ردحذف
  4. صباحك خير, بو داحم....
    بالبداية أحب أن أشيد بتشبيهاتك للمتبرجات وتطهيرهم بإسلوب ساخر يجبر القارئ أن يضحك ويسخر ويشمئز من هذه الشاكله مع العلم أن وصفك للفتاة قبل السخريه منها تجبر الرجل على عض شفتيه على طريقة نظرتك
    نظرة(الـ يالبيه)
    تفاهة ماشاهدته بالمقاطع تدل على تفاهة من يدعوا إليه ويرضاه..سنوات من الحوار والخوار والمطالبات...بالعدل والمساواة...
    وفي النهاية الناتج= شعب يترنح كمن يتخبطه الشيطان من المس لاينقصه سوى كأس معتق !!
    , ولمنظمي هذا الحفل الراقص مني تحية مليئة بالإستحقار

    ردحذف
  5. مسهم بالخير

    تصدق عاد يوم قريت أنك راجع من سفره قلت شكله مسافر لديرة ترد الروح عشان كذا غايب ههههههههه
    دحيم لاتدقق والله تتعب لانلعب على انفسنا ونقول محافظين يبوي الويكند الاستراحات والشاليهات حفلات وطهبله
    هذا من غير اللي بمواترهم يعني الوضع في إنحدار ف نصيحتي لك لاتسوي فيها انك محافظ وخش مع العالم وفلها

    ردحذف
  6. صباح الخير دحيم

    ليه ماجبت غرض والدتك يروحي عليها وبكل بساطه تحك ذقنك وتقول الباقي مايجيب لك ولازيت عافيه هههههههه حلاتها حذفتك بالفنجال والله :)
    بس شنو نظرة ال ي لبيه ههههه نظره جديده هذي بس اعجبتني النظره مالتك
    والبنت اللي تقول مطلعه خشمها هذي الحركه تصيبني بمقتل نفسي أنتحر اذا شفت بنت مسويتها وين يالاخت شفاط النمل مثلا بس حسيتني شفتها من وصفك هههههههههههههههههههههههه ماتسوى عليها كاشخه اخرتها تقول عنها باذنجانه مرشوش عليها ماي نوعية العباية هذي حقت اللحوج ام لمعه مدري شتحس فيه اللي تلبسها

    أنا قايله من اول المجتمع ماعاده محافظ,ودايم أكثر شخص يلوع جبدي "شخص ماء" دايم يحسسني بكلامه أني عايشه بمجتمع غير عن المجتمع اللي هو فيه,وأكثر كلمه يقولها عندنا بالرياض الحمد لله هههههه هذي حوبتك تتريق على الشرقيه وماصار فيها مثل اللي صار بمهرجانكم التراثي
    الله يهديني وياكم

    تصبح على خير بغادر المتصفح وانا أردد:
    وأنا أرسلت لك جملة مكاتيب ما رديت
    ...يالله عسى منتب على البعد ناويبي

    ردحذف
  7. غير معرفمايو 14, 2011

    هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه لاااااا مش معقوووووووووله كتاباتك جنونيييييييييييييييه تجبرني اضضضضضحكككك واوصل ضكتي اخر الحاره خخخخخخخخخخخخخخخخخخخخخخخخخخخخخخخخخخ




    عاد توني صاحيه من النوم ومعصبه وروقت عليها ههههههههههههههه ... وان كان على مهرجان الجنادريه عن جد طاااح طيحه هالسنه !! انا استغربت لما شفت المقطع باليوتيوب .. المفروض البنات يمسكون نفسهم فيه هيئه ولا مافيه فيئه ..

    ردحذف
  8. صبحكم الله بالخير ...
    الأخوان اللي طارت تعليقاتهم أعتذر منهم,بعض التعليقات لقيتها ورجعتها .. وبعضها طارت,ومالي دخل,السبب العطل اللي صار
    -----------------------

    السيف/والله شي يقهر وانا أخوك صحيح ماني مطوّع بس اللي شفته مايرضاه حتى زير النساء.. وأن شاء الله المصخره اللي صارت ماتتكرر..

    ردحذف
  9. رماديه/ شاكر لك إطرائك تسلمين وماتضيق ألا وتفرج هونيها وتهون


    أحمدي ربك أنك من سكان جده وأنك ماعمرك زرتي الجنادرية .. التراث بايخ كيف عاد يوم بربسو فيه
    والله يصلح الحال

    ردحذف
  10. ستهلال/ هلا صديقي الجديد.. والله مشغول ياصديقي الجديد(المشكله عاطل) وبعدين بالقطاره أحسن من أني أفتح البزبوز ابن آدم ماينعطى وجه لآعجبه شي وشبع منه يهده
    بسألك إعجابك بالوصف لأي مدى؟ *_^ هههههههههههه
    بعدين لاتقول الشعب منحرف تكلم عن نفسك انا مسواكي ماينزل من فمي :$
    بس تدري والله انك صادق فعلا مرقص الا شوي ناقص بس يجيبون كارلوس جارسا وأحلى دبكه على:
    تحت الفي ونبعة ميّ ...طبوش قاعد مع لولو
    عم بيلعبها بالميّ ...وشي تاني مش رح أولو
    سلوان شاف ال مبينشاف...صك ركابه وصار يخاف
    حط لولو تحت اللحاف ...وشي تاني مش رح أولو

    وداعاً ياصديقي الجديد

    ردحذف
  11. غير معرفمايو 14, 2011

    رغم أن الشعب السعودي محافظ هذره يرقص على هالأغنية

    سلوان شاف ال مبينشاف...صك ركابه وصار يخاف
    هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

    معليش ع الخطمه بس استوقفني ردك غصب عني ههههههههه يالعن أم الدشره يالولو أحسبك بريئه انتي وقرونك آخرتها مخربتها مع طبوش
    واصل ياهذره مع اني اتمنى تكتب تدوينه وتتعدى الخطوط الحمرا شوي أحس بتجي بطله على هالاسلوب ههههههه

    ردحذف
  12. دييييييي ^_^

    والله ياهذره مدري وش كتب اعلق على التدوينه ولا على ردك على صديقك الجديد استهلال هههههههههههههه
    يعني تشوف الرجال قرر يصاقدك تقوم تخرعه وتعلمه وش الاغاني اللي تسمعها..طيب ع الاقل لاتحط البيت اللي يقول سلوان شاف ال مبينشاف ههههههههههه صراحه ذبحتني اللقافه ابي اعرف ليه صك ركبته وصار يخاف ههههههههه

    ومن ناحية شعبك المحافظ يارجال عساك سالم غلطو غلطه عمرهم يوم ضايقو الهيئه وخلوهم ينسحبون وعلى قول المثل:طبخن طبختيه يالرفله كليه.. الدشره وقلة الحيا نلقاها بالأماكن الضيقه والزقاق"ادري ابهرتك بكلمة زقاق" كيف عاد الجنادريه زحمه وعالم يارجال بحق اذا ماصار تخصيب يورانيوم ورى الخيام
    الله يصلح الحال بس ويغفر لنا والمسلمين

    ايوه تقولي طبوش وش قال لـ لولو ؟ ههههههههههههههههههههههههههههههههههههههههههههههههههههههههههههههههههههههههههه

    ردحذف
  13. شخص ماء/ يالله اجعل مسائه خير وارزقه يارازق الطير

    ماحدث يعتبر إنتصار لللبراليه ماحدث إنتصار لهم ونقطة تحول للتحرر الذي طالما طالبوا فيه
    وتذكر أن الماسك على دينه في هذا الزمان كالماسك على جمره.. الله يثبت قلوبنا على دينه
    يقول عمر الفاروق رضي الله عنه :نحن قوم أعزنا الله بالإسلام .. فإن إبتغينا العزة بغيره أذلنا الله.

    ----------------------------------

    أبو سعود/ مسييت بمثله
    بغض النظر عن كوني مطوّع أو داشر المسأله غيره وانا أخوك من يرضى على أخته وزوجته وبنته ترقص بالشكل هذا وقدام آلآف الرجال(ورجال جايعه تبي تاكل) !!

    -------------------------------------

    لاذعة الفكر/ مساء الخير
    الحين مسويه طالعه منها يوم تقولين مهرجانكم التراثي؟ تبين أسوي مثل حركاتكم باليوم الوطني يوم كسرتوا المحلات قلتوا (هذولا شباب الرياض عيال الشرقيه كول وفلّه بس يرقصون وينبسطون) وهذا اللي صار بالجنادريه رقص وفله ههههههههههه وبالنسبه لشخص ماء تقولين محوم كبدك يقول عندنا بالرياض الحمد لله فـ أحب اقوله (حط عيونك بعيوني وانتبه ترمش) *_^
    ماعليك منّه هو دايم كذا .. الحين إذا رحت عنده أتقهوى وسولفت له عن شي يقول(هذا بحي التعاون عندكم عندنا الحمد لله)!! هههههههه

    آمين الله يهدينا وياك

    ردحذف
  14. مجهوله/ صح النوم

    شلون يمسكون نفسهم وهم يبون هالحاجات؟
    مثل راعي الخمر لو ندخله بار ونقول انتبه تشرب؟ مع العلم أن فيه حاجات يقدر يشربها غير الخمر
    -------------------------------------------

    مجهول/ لاتتهمني :$
    شفت كيف حتى لولو هي وقرونها ووجهها ذا المربع اللي يذكرني بوجه فلسفه صارت خربانه وهذا دليل ان المظهر دايم يخدع المهم الجوهر

    ردحذف
  15. يالعين يعني ترد الحركه شكلك منقهر انهم قالوا هذول شباب الرياض هههههههههههههههههههههههه

    حسبي عليك مت ضحك على شخص ماء هههههههههههههههههههه
    هههههههههههههههههههههههههههههههههههه أجل هو كذا انا حسبالي عنصري علي انا.... طلع هذا نظامه يحب يخلي المكان اللي هو فيه احسن مكان هههههههههههه

    اشوفك بتدوينه جديده يبو لولو وطبوش خخخخخخ

    ردحذف
  16. غير معرفمايو 14, 2011

    أهم شي بعد كل موقف تحط رغم ان الشعب محافظ ههههههه
    انا اشوف الهيئه وجودها ماله دخل يعني اللي رقصت لابسه جلابيه هذي لو الهيئه فيه تلقاها تأشر بجوالها
    اعجبني توضيحك بانك مو رجعي هههههه لامانع من الاستهبال والاستنزال على انغام وأنا أرسلت لك جملة مكاتيب ما رديت...يالله عسى منتب على البعد ناويبي
    الله يتوب علينا
    تدوينه موفقه ننتظر الجاي
    تهاني مرت من هنا..

    ردحذف
  17. غير معرفمايو 14, 2011

    يسلم راسك وكل غيور والله يحفظنا من كل فاسد

    ريناد

    ردحذف
  18. غير معرفمايو 14, 2011

    كل الناس انصدمت باللي صار ماتوقعنا يصير كل هذا
    مدري شقول بس الجنادريه مثلها مثل صدمتنا بلولو وطبوش هههههههههههههههههه

    عساك ع القوه.. اشواق

    ردحذف
  19. فلسفه/ هلا والله ..شفيكم تحطون روابط ترى تقدرون تردون بدون ذا المشوار
    بالنسبه لصديقي الجديد ياخي وش اسوي فيه أجل يقول أنا فكرت لكن الحين قررت ههههه سلامات حسسني اني خاطبه واهله قايلين بنرد لكم
    بعدين شفيكم كلكم هبيتوا بلولو انا مدري وش الشي الغلط باللي يسوونه؟ يلعب معها بمويه وشي ثاني مايبي يقوله؟ يعني لازم يكون شي مو كويس والله من زين التفكير عندكم :$
    وبيت سلوان تقول مفروض ماحطيته؟ طيب يمكن سلوان شاف واحد ميت وخاف !
    بس صراحه ابهرتني بكلمة زقاق هههههههههههه برب بروح انادي ابوي اقول شف صديقي النتي يعرف يقول هالكلمه ابكشخ بك عنده
    ومن ناحية التخصيب الحين ايران قطعوا عنها اليورانيوم عشان مايتم المفاعل النووي وتصير كارثه مفروض برضوا الجنادريه يقطعون اليورانيوم بتقول وش اليورانيوم اقولك النساااء النساااء( قلها على طريقة ابو مساعد) تقول كيف اقول رجال الهيئه يفرقون بين النساء والرجال عشان مايتم التخصيب وتصير كارثه وعقب 9 شهور يجي جنين تراثي !!

    آمين الله يغفر لنا ويصلح حالنا

    ههههههههههههه وخر بس منيب قايلك وش قال

    ----------------------------------

    تهاني/ والله كلامك صح ,لكن تأشر بجوالها أحسن من انها تترنح .. بالتوفيق

    -----------------------------------------
    ريناد/ سلمتي وسلم غاليك ومغليك... آمين


    -------------------------------
    اشواق/ شفتي شلون لولو كثر الكلام عليها من شاكلة فلسفه مالها الا الصبر ..الله يستر على سالي وليدي لايجيهم الدور
    قواك الله

    ردحذف
  20. غير معرفمايو 15, 2011

    والله ودي اقولك لأي مدى بس اخاف تحجب المدونه ههههه
    وسالفة مسواكك هذا اللي خلاني أقرر اصادقك واضح أن مافيه مثلك أحس بينك وبين الاخلاق أنك تترك البنات وبينك وبين الطواعه انك تترك الدخان وبينك وبين الاستقامه انك تترك الافلام الخالعه< وش بقيت ؟ ههههههههههههه
    فلسفه: بالعكس تصدق عاد بعد لولو وطبوش تحمت للصداقه أكثر لأني تأكدت ان هذره من النوع اللي ابي ههههههههههههههه وماعليك اذا صرت امون عليه بقوله لولو وش قالت لطبوش وأرد لك

    ارسلت طلب الاضافه ياصديقي.. ايميلي آخره"لايف"

    إستهلال

    ردحذف
  21. غير معرفمايو 15, 2011

    أما جنين تراثي هههههه تخيلت شكله معه ربابه ولا عقال من العقل القديمه الكبيره اللي منول يعقلون رجول البعارين فيها
    تصدق فكيت ازمه توني أدري اني اقدر اصير مجهول تلقى ذا الرفله لاذعة تقرى مجهول وتقول لا انا بنت حموله ماتدري وش الطبخه وأدري انك رايح تنادي ابوك هذا اذا مانديت اهلك كلهم دايم أنت تكشخ فيني


    استهلال:أجل تأكدت انه من النوع اللي تبي هههههههه وضعك مش مضبوط يبو ... هذره أنتبه ترى من تالي كاثرين اللي قالبه جيناتهم لايصير نعوم وتنشب فيه ترى مهوب بنت تقدر تصرفه والله ان تلقاه كل يوم عند عتبة بابك هههههههه ولا يصير بزرنجي يكتب على موتره لعيون هذره ويدور بحارتكم يجيب الشكه لك ههههههه

    فلسفه< تصدق أنها أحسن كذا من أني احط رابط ملفي

    ردحذف
  22. , ورغم أن الشعب السعودي " محافظَ ".. !!
    كيف الشعب السعوديِ محافظَ ونصه علمانية والنص الثانيِ ليبراليةً وربع الربعَ مطوعَ شكلاً ومنحرفَ أخلاقاً
    ياأخيِ السعوديه الحين غيرَ يبغون الحرية زي مايقولون يعني تقارن السعودية المشهبه هذي بنيويورك مثلاً
    يبون بناتهم يسوقون ويبون حقوق للمرأة
    اللي ماتنعطى وجهه كل شيء تبي فيه حقوق مابقى الا ترفع شكوى على المواعين بعدَ ><
    الله لايبلانا يارب يالله الصلاح بس
    >> قلنا لكم مسبقاً اوب سعوديةً >> برا ض1
    بالنسبة للجنادرية هاذي السنة كانت اول مرة اطبها واخر مرا ان شاء الله طبعاً كان يوم خميسَ وزحمة بشكلِ فا أوم الحشرةً أحاول اتحرك يمين , يسار تبعد يقربون , وزحمة وقلق مايمديك تشوف شيء والمشكلة
    يقولون جنادرية وماشفنا الا ربع من التراث والباقي
    مصخرة اجل وزارة العدل والزراعة ومادري وشو شدخلها بالتراث ,
    ولا عاد الأرضية وصخخهَ كانك بمزبلة تجيبَ الغثيانَ
    لازم ترفع العباية لسلامتك >> بتلبس عباية مثلاً خَخَخَخَ
    وطبعاً كل شيء يهون ولا مرقص عسيرَ
    والله العظيم حسيت بصداع مزمن وكلنا نردد هذي السعوديةَ
    هذي السعودية الليِ كنتوا تبغون صارت
    والله حسينا بقيمة الهيئة الجباره والله يجعل اعمالهم بموازين حسناتهم
    الديرة بدونهم بتضيع لامحاله
    أهنيك عالموضوع اخويِ وجبتها عالجرحَ وأكبر دليل لفساد الجنادريةً الغبارَ المصاحب للجنادرية كل سنةً
    ولا للجنادريةً ^_~

    ردحذف
  23. زحمة حكي/ نص علمانيه ونص ليبراليه,مابقى شي من وين طلعتي ربع الربع,طيب بقي لنا ربع ونحط العشم فيهم

    المشكله أنهم فاهمين الحريه غلط بعطيك مثال...
    القروي فلسفه جاني بالاستراحه قلت له:
    أن البسكوت حلو وحمسته بعدها قلت له شفه بالمطبخ هوأنبسط وتحمس يذوقه ..
    من الثواره كلا البسكوت وكلا الماجي !

    اللي ابي أوصله من مثال القروي فلسفه:
    أن الحريه اللي يطالبون فيها يزينوها لهم العلمانيين على مايشتهون يطالبون بشي مايدرون وشو,وبيدخلونه بحماس وبتضيع الطاسه بيسوون الزين والشين
    وأكبر دليل اللي صار بالمهرجان راحت الهيئه
    والناتج:(تحرش بالعاقله والصايعه) !

    بس أحب أشكرك على الملاحظه(لازم أرفع العبايه)ِ
    أتوقع الملاحظه هذي راح يطبقها فلسفه لأنه لو يلبس عبايه أرحم له وبإذن الله ماتحسب عليه تشبه بالنساء
    من باب عدم ترويع المسلمين لأنه مخيف جداً,لدرجة أن اللي كتب بياناته في بطاقة الاحوال
    عند الجنس كاتب: ماحط بذمتي !

    وأضم صوتي لصوتك( لا للجنادرية)ِ

    ردحذف
  24. "القروي فلسفه جاني بالاستراحه قلت له:
    أن البسكوت حلو وحمسته بعدها قلت له شفه بالمطبخ هوأنبسط وتحمس يذوقه ..
    من الثواره كلا البسكوت وكلا الماجي !"
    ههههههههههههههههههههههههههههههههههههه
    هههههههههههههههههههههههههههههههههههه
    هههههههههههههههههههههههههههههههههههه
    ههههههههههههههههههههههههههههههههههه


    فلسفه أجل تقول لاذعة الرفله تقول لا أنا بنت حموله مو مجهوله آخرتها ماكل الماجي يالقروي

    "لدرجة أن اللي كتب بياناته في بطاقة الاحوال
    عند الجنس كاتب: ماحط بذمتي !"
    ههههههههههههههههههههههههههههههههههههه
    هههههههههههههههههههههههههههههههههههههههههههه

    فلسفه أعتبرها نصيحه من اختك روح موت هههههههههههههه

    ردحذف
  25. ياخي سلك والمقصود ربع علمانية وربع ليبرالية وربع يضرب فيهم المثل كـ زحمة حكي مثلاً ض1
    وماقول الا الله لك يافلسفة هههههههـ

    ردحذف
  26. غير معرفمايو 19, 2011

    تصدق اني فخور فيك كصديق


    احسدك على مقالاتك

    ماشاء الله تبارك الله


    حبي وتقديري دحوومي

    ردحذف
  27. زحمه/ أهم شي الربع اللي ينضرب فيهم المثل ههههههههه

    -----------------------

    مجهول/ شكراً ياصديقي مع أني مدري من أنت

    ------------------------------

    فلسفه/ أدري قريت لكن ماتدري وش تقول ههههههههههه

    ردحذف
  28. غير معرفيونيو 01, 2011

    الله يصلح الحال وانا اخوك والله أنك بردت كبدي باللي لابسه عبايه ضيقه وتلمع ولايهونون أشباه الرجال بالمهرجان الله يحرم عليك النار أنت ووالديك

    ردحذف
  29. ماشاء الله
    راقت لي كلماتك كثيراً
    أضحكتني :)
    استمر

    ردحذف
  30. مجهول/آمين وياك ووالديك ومن يقرأ, جزاك الله خير


    -------------------------
    صفاء/ تضحكلك الدنيا يارب .. شرفتي

    ردحذف
  31. أزال المؤلف هذا التعليق.

    ردحذف
  32. والله صآدق ..
    أجل وش تقول أذا شفت بلاوي موظفين المستشفى
    طبعاهذا غير عن كيفية أدائهم بالعمل . سخره تصير عيني عينك والسبب عادي زميلي كل يوم معه تعودت عليه
    خلها على الله يابن الحلال الحين اهلنا ماعاد يثقون فينا بحكم مجال عملنا اللي يستوجب الأختلاط والسبه من ناس شوهت سمعة المجال الصحي بقلة حيائها


    بس من جد تدوينه بطله قلبت المواجع

    ردحذف
  33. Lama Hamad /
    جميع ماذكرتيه + نقص مفرط, أنا متأكد أن الفئه هذي أكثر الناس قراوه وملحجه لا بتصرفات ولاتعامل ولابهيئه ,

    -----------------------

    بآريسسْيه/

    شفت بعيني وانا أخوك .. صراحه أبجح من حقين المستشفيات ماشفت قدام الناس ولاعندهم في أحد .. انا صراحه أحسب كل موظفي المشتشفيات كذا , لكن قالي واحد من اخوياي لا تظلمهم المسخره هذي تشمل 90% فيه 10% محترمين !!
    وصادقه والله الحين نادر تلقين أحد يرضى أخته أو زوجته تتوظف في الصحه والسبب
    (وحده ماصانت شرفها وسمعت أهلها مع واحد معروف عند جماعته أنه هو والجزمه سوى وانتي بكرامه ومن يقرأ)

    ردحذف
  34. غير معرفيوليو 20, 2011

    ماقول الا يالبيه .. زود على انك مهووي (((( عقلك كبييير وفاهم صح ))))

    لاتنسى تجاوبني ..بخصوص ذاك السؤال D:

    ردحذف
  35. لبى قلبك بعض ماعندك .. ياصديقي اللي بيمسك يدي ويمشيني بالحارة وكل مامرّ من عند داشر يقول اللي يتكلم على هذا بلعن شكله تراه صديقي ض1

    جاوبت على سؤالك بموضوع القهوجي

    ردحذف
  36. غير معرفأغسطس 04, 2011

    ههههههههههههههههههههههههه . . أضحكتني ب أسسى ( بِ الله مهيب قويّه ) . .

    عجبني جداً تشبيهك لِ الباذنجانه ههههههههههههههه . .
    يابن الحلآل يَ ليتها وقفت على زوّار الجنادريه . . تعآل شُوف الأمن . . :( من جد [ حاميها حراميها ]

    موضضضوعك بَططل ، حسّاس ، شفاف وصريح . .

    دحمي إنت كِذا ( يد تسوي علامة ال أوكي ) . . يرحم شيبآنك لاتبخل عَلينا ب موآضيعك سوآء هنا أو في المسآطيل . .

    [ مجهولة المساطيل ض١ ]

    ردحذف
  37. ههههههههههههههه يالعن أم الكلمه وش ذا الهباال شلون قلتيها( شكلي بردد كلمة أسى الين يأذن المغرب) ابتعود على هالكلمه الخطيره
    الأمن والله مدري ماشفت شي منعم ودامني ماشفت منيب سابهم مع ان فيه واحد منهم وجهه مخيس واحس انه إحدى اسباب ثقب الاوزون, بس ماسوى شي قاهرني لأن وجهه مخيس !!

    تدرين عاد ان مواصفات موضوعي اللي قلتيها ,,, كنها مواصفاتي بس زيدي عليها خجول, رومنسي هههههههه(يووه ياليتني صدق كذا)

    وانتي بعد كذا ,,, ورحم الله شيبانك ونَعم سيقانك ,
    ان شاء الله ابشري

    ردحذف
  38. صباح الجمال والعطاء


    تأسرني بكتاباتك العذبه والطرح الصادق
    الممزوج بروح الفكاهه
    كما انت فائق الابداع


    عزيزي المشكله ليست بغياب وحضور الهيئه فقط
    نحن نفتقد لرادع ديني وخلقي وتربوي

    زمان لم تكون هناك هيئات وكنا الاختلاط موجود رغم هذا كانت الرجوله والاخلاق تترفع بصاحبها

    للاسف الان وبكل صدق اقول لك نحن شعوب تفتقر للرجوله والاخلاق ومفهوم الحياء والعفه
    اصبحنا ع قارعه الطريق
    وامسينا نعقتد ان التطور والحضاره بهذا الانحطاط

    الكلام يطول وماكنت هنا الا مؤيد لفكرك الراقي

    ردحذف
  39. مسائك خير صديق الحياة
    احرجتني بإطرائك مدري وش اقولك بطولك شكراً ماتليق الا عليك

    ماحب صيغة الجمع ياصديق الحياة صحيح فيه ناس ماعندهم رادع,لكن بالمقابل فيه ناس فيهم خير والرجوله تطوشر من عيونهم, لكن الفئة اللي أنت ذكرتها مالين البلد,ولا ودي أخوض بهالنقطه وأتعمق فيها أخاف أزعل بعض الناس ههههه واللي يفتقدون للرجوله على قولتك سيماهم في وجوههم وأولهم النوعية اللي يحس أنه مايصير كشخه ألا اذا طلع(خط الإستواء اللي أسفل ظهره)!
    أنا معك بكلامك لكن اللي أشوفه أن الناس ماعاد تبي تدّخَل بغيرها يعني سابقاً ماهو شرط رجل هيئة يمكن أي شخص يشوف شي غلط, يفسخ عقاله ويموسر الغلطان وحالياً الناس تركت هالشي, فـ اذا تبي نرجع هالطريقة انا وأنت؟ امرك وندور أي احد نجلده ههههههههه

    منّور المتصفح ياصديق الحياة لاعدمت هالطله

    ردحذف
  40. هههههههههههههههههههههههههههههههههه

    المشكلة أننا و سنظل نردد

    (ورغم أن الشعب السعودي محافظ)

    ردحذف
  41. aaaaaaaaaaaaaaaaaaaaaaaaaaaaaaaaaaaaaaaa

    ردحذف
  42. غير معرفأكتوبر 04, 2012

    طولت ياحبيب الروح

    ردحذف
  43. شيء مؤسف و مخيف .. كلما قرأت او سمعت عن تصرفات كهذه ..

    ادع ربِ أن يحفظ ابنتي ذو الثمانية أشهر و ان يوفقني لحسن تربيتها .. فعلا زمن مخيف .. =(

    و مايؤسفني أكثر هو اصرار الناس بأن الهيئة هي كبت و تخلف و جاهلية =(

    ربنا لا تؤاخذنا بمافعل السفهاء منا ..

    والله يستر على المسلمين أجمعين ..

    ردحذف
  44. اللهم امين ..كلام صحيح ضاع تراثنا والأحتفال فيه
    وتعريفه للأجيال القادمه شكراً لك مقال رائع

    ردحذف